7. 10. 2021: Выглядкова вежа на Дуклї знова приступна навщівникам

З нагоды 77-ой рочніцї Карпато-дукляньской операції в середу, 6-го октобра 2021-го року, за участи міністра обраны Словацькой републікы Ярослава Надя одбыло ся святочне одкрытя Выглядковой вежы на Дуклї.

Як інформовала аґентура TASR, в попереднїх місяцях вежа перешла комплетнов реконштрукціёв. Фінанції на ню дало Міністерство обраны СР з цїлём підпорити інтерес людей, а главно молодых людей о воєньску історію Словакії.

Доступность і комфорт про навщівників

Цїлём реконштрукції выглядковой вежы было подля директора Воєньского історічного інштітуту Мірослава Чапловіча підняти їй атрактівность, а так само доступность і комфорт про навщівників.

„В резортї обраны нам на історії досправды залежыть, што потверджуєме підпоров справованых інштітуцій в старостливости о окремы експонаты і обєкты, якым є і облюблена выглядкова вежа на Дуклї. Окрем того, посередництвом дотачных механізмів підтримуєме і мімовладны орґанізації в реалізації смыслуповных проєктів повязаных з історіёв Словацькой републікы,“ повів міністер Надь.

Почас святочного одкрытя, котре одбыло ся в памятный день – День героїв Карпато-дукляньской опрації, Надь в просторах вежы оцїнив Памятнов медайлов міністра обраны in memoriam 32 участників народного одбоя за ослободжіня, котры вызначно помогли в бої проти фашізму.

Передали історічны експонаты

Меджі селами Капішова, Кружлёва і Нижня Писана, в такзваній Долинї смерти, пак одбыло ся сімболічне переданя історічных експонатів – танків T-34/85, пожыченых Воєньскым історічным інштітутом, котры зреконштруовало Здружіня мікрореґіону Долина смерти. Проєкт підпорив резорт обраны із своёй дотачной схемы.

Зреконштруована танкова техніка теперь знова реалістічно припоминать навщівникам Долины смерти танковы бої, котры в тім просторі проходили од 25-го до 27-го октобра 1944-го року.

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: Ярослав Надь.