6. 9. 2019 Земан прияв Русинів. Підтримує теріторіалну цїлость Україны, говорить Овчачек

3-го септембра 2019-го року презідент Чеськой републікы Мілош Земан офіціално прияв на Пражскім замку делеґацію підкарпатьскых Русинів. Говорили о Русинах в Чеській републіцї і Міньскых договорах.

Як інформовав оіфіціалный сайт чеського презідента, Земан прияв Василя Джугана, председу „Всемірного совіту підкарпатьскых Русинів‟. В делеґації Русинів із Підкарпатя были і Михаіл Тяско, Димитрій Сидор, Іван Данацько, Андрій Фатула і далшы.

 

З Русинами є історічне одношіня

Їжі Овчачек, директор Пресового оддїліїя і пресовый гововрця презідента Чеськой републікы нашу редакцію інформовав, же стрїча одбыла ся із нагоды сторічніцї од підписаня мірного договору в Сен-Жермен, чім втогдышня Підкарпатьска Русь стала частёв Чехословацькой републікы. Договор быв підписаный 10-го септембра 1919-го року. Овчачек конштатовав, же Чеська републіка має вдяка тому історічны односины з Русинами.

Русины, як інформовав русиньскый обчаниьскый актівіста Івана Данацько, од презідента „нич не просили, а подаровали образ Я. Дуленкова Вид на міст Масарика.“ Так само передали подяку за залишену по Чехах архітектонічну дїдовизну од мера (пріматора) Ужгорода Богдана Адрієва і посланецького корпусу Закарпатьской областной рады.

 

Бісїдовали о робочім рынку і Міньскых договорах

Як інформовав говорця Овчачек, презідент Земан в розговорї з представителями Русинів на Пражскім замку інтересовав ся передовшыткым і їх сітуацію в Чесьскій републіцї і уплатнїню на робочім рынку в тій державі. Русины презідента інформовали і о жывотї Русинів у Закарпатьскій области Україны.

„В діскусії быв спомянутый і вопрос Міньскых договорів, котры рахують з децентралізаціёв Україны. Пан презідент єдночасно підкреслив, же повно підтримує і має в почливости теріторіалну цїлость Україны,“ додав Овчачек.

 

О Русинах зо Зеленьскым?

По стрїчі підкарпатьскых Русинів з презідентом Земаном в російскых і україньскых медіях зачали ся пошырёвати інформації, же презідент Чеськой републікы приобіцяв делеґації, котру вів Джуган, говорити з презідентом Україны Володиміром Зеленьскым на тему Русинів.

На вопрос, ці таке приобіцяня з боку чеського презідента зазвучало, ёго говорця одповів лем так, же в припадї, кебы ся стрїтив Мілош Земан з Володиміром Зеленьскым, вопрос Русинів бы быв самособов можный, і вдяка споминаным історічным односинам Чеськой републікы ку Русинам. Приобіцяня одкрыти тоту тему Овчачек не підтвердив.

Петро МЕДВІДЬ, ЛЕМ.фм, здрой фотоґрафії: Miloš Zeman – prezident České republiky.

Script logo