6. 6. 2024: Єпіскопы Рады єрархів на Дікастерії про восточны церькви
В неділю, 2-го юна 2024-го року, до Рима пришли єпіскопы, члены Рады єрархів Ґрекокатолицькой церькви на Словакії, жебы приєднати ся ку делеґації словацькых римокатолицькых єпіскопів у рамках навщівы Ad limina apostolorum.
Почас цїлого тыждня мають навщівловати окремы римскы уряды, жебы там презентовати стан своїх єпархій і дієцез за послїднїіх сім років. Інформовав о тім Пресовый центер Кошыцькой єпархії.
До Рима за Ґрекокатолицьку церьков на Словакії пришли Його Высокопреосвященство Йона Йосиф Максим – архієпіскоп і митрополіта пряшівскый, архієпіскоп Кіріл Василь – кошіцькый єпарха, владыка Петро Руснак – братїславскый єпарха і владыка Мілан Лах – помічный єпіскоп Братїславской єпархії.
Почас другого дня, 4-го юна, ґрекокатолицькы єрархы завітали на Дікастерію про восточны церькви (бывша Конґреґація про восточны церькви, позн. ред.). То головна дікастерія про восточны католицькы церькви, яка має власти над єпархіями, єпіскопами, духовенством, монахами і віруючіма восточного обряду.
Єпіскопів прияв префект дікастерії кардінал Клаудіо Ґуджеротті, підсекретарь Монс. Філіппо Кіампанеллі і офіціал дікастерії Монс. Олександр Сапунко.
Кір Йона в імени Ґрекокатолицькой церькви на Словакії поздоровив веджіня дікастерії і єдночасно представив церьков, котрой є головов, і lorum. Голова Ґрекокатолицькой церькви на Словакії так само спомянув найванайважнїшы моменты з єй жывота за період од послїднёй навщівы Ad limina aпостолькой вызвы, котры стоять в найблизшій будучности перед ґрекокатоликами на Словакії.
Як пише Пресовый центер Кошіцькой єпархії, кардінал Ґуджеротті выразив велику радость, же Рада єрархів є по довшім часї комплетна, повно фунґуюча, і може з новов енерґіёв наповно робити. Робота Рады єрархів як найвысшого орґану митрополітной церькви обновила ся по двох роках, котры перешли меджі абдікаціёв бывшого архієпіскопа і митрополіты Йоана Бабяка і інтронізаціёв кір Йоны.
Почас стрїчі были обговорены різны пункты, передовшыткым літурґічны і юрідічны вопросы, духовный жывот священиків і їх родин, вопрос покликань до священства і формації в семінарії, душпастырьства в загранічу, односины з іншыма ґрекокатолицькыма церьквами як і екуменічны односины.
Кір Йона на кінцю подяковав за приятя і запросив кардінала Ґуджеротті на навщіву Словакії. В імени Рады єрархів му передав дарунок – найновішы выданя мап Ґрекокатолицькой і Римокатолицькой церькви на Словакії.
Ad limina apostolorum – дословно „Ку порогам апостолів“, є означіня повинной навщівы дієцезных або єпархіалных єпіскопів і далшых функціонарів Католицькой церькви встановленых церьковным правом Вселеньского Архієрея.
Мала бы мати пятьрочный інтервал. Єпіскопы подавають Папови римскому інформацію о ставі у своїй дієцезї або єпархії ці церьковній громады. Так само єпіскопы навщівлюють окремы дікастерії і папскы рады, жебы їх інформовати о сучаснім дїяню на своїй церьковній теріторії.
Петро МЕДВІДЬ, ЛЕМ.фм, языкова і ґрафічна управа: АРК в СР.
