6. 2. 2021: Реконштрукція Варголового музея штораз реалнїша. Жупа дістала далшы грошы

Пряшівскый самосправный край має на своїм банковім контї другу часть державной дотації на велику обнову і модернізацію Музея модерного уменя Енді Варгола в Меджілабірцях в сумі штрири міліоны евр. Інформовала о тім аґентура SITA.

Пряшівскы жупа, котра є здряджователём музея, так уж од державы дістала шість міліонів з цїлковой дотації 7,1 міліона. Послїдня часть грошей має прийти до кінця януара слїдуючого року. Як інформовала Даша Єленёва, говоркыня ПСК, з боку жупы ся вже зробили вшыткы протребны крокы про приправу обновы.

Перерабляти ся буде два рокы

„В руках маєме ставебне поволїня і підписаный контракт з додавателём реалізачного проєкту, котрый буде выпрацованый до 31-го марца 2021. Вєдно з докінчінём реалізачного проєкту буде проходити приправа публічного обстараваня на додавателя ставебных робот,“ повіла про аґентуру Єленёва.

Жупа очекує выголошіня обстараваня до кінця мая того року. Зачаток ставебных робот буде залежати од резултату обстараваня, інформовала говоркыня з тым, же то очекують найпізнїше на ярь слїдуючого року.  Реконштрукція бы мала тырвати 24 місяцїв.

Велика реконштрукція

Музей модерного уменя Енді Варгола в Меджілабірцях є в просторах будовы із 80-років минулого столїтя. В рамках реконштрукції ПСК планує оправити фасаду і просторы музея, прибудовати і надбудовати просторы. Будинок буде мати новы облакы, дверї, стїны зо скла, підлогы, выминить ся електроіншталація, воздушна техніка і сістема забезпечіня.

Перебудова принесе і розшыріня ґалерії а депозіту, выникнуть новы ательєры, прибудуть інтерактівны елементы, буде і простор про освітнї проґрамы, а тїшыти ся мож і на інтереснїшы експозіції.

Просторы розшырять ся о три штокы, чім выникне простор про розлічны конференції, мултімедіалны презентації, мали сценічны формы ці бісїды. На стрїсї буде оддыхова зона у формі амфітеатру.

На велику реконштрукцію єдиного музея свого тіпу в Европі, і єдного з двох на світї, выдїлила грошы іщі влада Петра Пеллеґрінія на своїм выїздовім засїданю в Кежмарку в октобрї 2019-го року в цїлковій сумі 7,1 міліона евр. Першы два міліоны пришли в септембрї 2020-го року. Остаток грошей в сумі 1,1 міліона має прийти до 31-го януара 2022-го року.

Петро МЕДВІДЬ, ЛЕМ.фм, языкова управа: ред. АРК в СР, автор фотоґрафії: Ян Штовка, MQEP