6. 2. 2020 - В Нїмецьку хотять охрану меншын дати до конштітуції

Нїмецька конштітуція бы мала быти змінена так, жебы їй частёв стала пряма вызва на охрану народностных меншын. Тоту пожадавку у понеділёк, 3-го фебруара 2020-го року, высловила Нїмецька рада про народностны меншыны. Інформовала о тім аґентура DPA.

Меншынова рада в Нїмецьку заступать штири меншыны – Данів, Фрізів, нїмецькых Сінтів і Ромів а лужыцькых Сербів.

„Час вже на то дозрів,“ цітовала пресаґнетура шефа споминаной рады Давіда Статніка. Додав, же потрібну резолуцію вже запропоновала федератівна републіка Шлезвіґ-Голштейн у вышнїй палатї нїмецького Бундестаґу, но дотеперь не здобыла векшынову підпору.

Цїлём рады про народностны меншыны в Нїмецьку є, жебы до конштітуції быв доповненый додаток о тім, „же держава решпектує ідентічность автохтонных народностных меншын і етнічных ґруп, котры суть в Нїмецьку узнаны на основі Рамкового договору Рады Европы о охранї народностных меншын“.

Статя 3 нїмецькой конштітуції ґарантує рівность вшыткых людей, но меншыны ся в ній експліцітно не споминають.

Статнік повів, же Нїмецько є у вопросї охраны народностных меншын на правилній пути. „Маєме правны рамкы, котры уможнюють много дїл, і маєме фінанчну підпору.То в іншых країнах не єствує,“ додав. Но єдночасно звернув увагу на то, же проблемов є в Нїмецьку участь народностных меншын на політічнім жывотї.

Як приклад спомянув выходоевропскы державы, в котрых собі членове народностных меншнын выберають своїх представителїв до парламенту. (позн. ред.: в тым чіслї і Русины Сербії, Румунії і Мадярьска.)

Петро МЕДВІДЬ, ЛЕМ.фм