6. 12. 2019: Нацийональне свято Русинів в Польщы

Приняло ся в нашій цивілізациі, што найвеце святкуєме округлы даты, річниці. В примірі нацийонального свята, котре лучыт вшыткых членів даной ґрупы – народу, мусит быти інакше. 5. грудня/децембра 2019 р., припадат 101. річниця фльориньского віче, якє дало початок Рускій Народній Республиці Лемків.

Дата 5. грудня/децембра была принята на пропозицию Світовой Рады Русинів як свято Русинів в Польщы. Лемкы, котры належат до той асоцияциі, выбрали як раз річницю великого віче во Фльоринці, котре не лем в архівных документах і справописах записало ся як выняткова подія, але і серед самых Лемків, якы з діда-прадіда передают собі вагу той подіі.

Влони, так як наша цивілізация того вымагат, в місци, де в 1918 р. зышло ся віче близко 500 делеґатів зо 100 сел, ґрупа десяткратно меньша стрітила ся, штобы символично упамятнити історичны подіі. Як кажде народне згромаджыня, было оно і маніфестацийом нашой єдности. Были Лемкы, але і Русины з Пряшівской і Підкарпатской Руси. Были і представникы інчых нацийональности, котры в почутю потребы плеканя даном ґрупом памяти рішыли, што і Лемкы мают право до свойой памяти – історичной, незалежной і безварунковой.

На жаль, як выявило ся наперед нашой влонишньой річниці, не лем власти Римокатолицкого Костела, котрый завідує днес фльориньском церквю і приходством, але тіж державны власти, в роді Інституту Нацийональной Памяти, одмовили згоды на одкрытя пропамятной таблиці в місци, котре бы того вымагало. Конец-кіньом таблиця нашла місце в лемківскій інституциі культуры – Рускій Бурсі в Ґорлицях.

Памятаючы заєдно лем добры моменты і великій подвиг нашых предків, днес желаме вшыткым Лемкам/Русинам радістного, спокійного святкуваня Дня Русина в Польщы. Най нацийональне свято буде для нас дньом єдности і почутя в «бытю», а не лем в «бываню» собом – Лемкыньом/Лемком.

Вшыткого доброго! Зо святом Дня Русина!

На Лемковині, в нашым краю
Шумят смерекы і ялиці –
Побідну пісню они грают
Од Ужгорода до Щавниці.

І гремит хор Карпатскых гор,
В далеку даль гет плыне –
В Карпатах днес народ воскрес
І право його не згыне!

На Лемковині і в Талергофі
Невинна кров пролята –
Най в нашых серцях на все остане
Памятка – вічна і свята.

Могучый хор Карпатскых гор
Най вітер несе во всі стороны,
Най прийде час – най уж і в нас
Здоптана правда встане!

 

Севериян КОСОВСКЫЙ, ЛЕМ.фм

(Публікуєме в оріґіналї – лемківскім варіантї русиньского языка.)