6. 12. 2019: ТАД номінованый на Премію Академії театралных творцїв

„Найлїпша пєса 21-го столїтя про двох герцїв“, писало ся в анотації Театру Александра Духновіча, кедь приготовлёвали інсценацію під назвов Пісковиско од польского драматурґа Михала Валчака.

Теперь ся Пісковиско, котре режійно приготовив Браньо Мазух з геречками Зденков Квасковов і Іветов Фейковов, дістало меджі 14 номінацій, з котрых выберуть, хто тот рік премєрово здобуде нову Премію Академії театрланых творців (Akadémia divadelných tvorcov).

Премія Академії

Академія театралных творцїв была основана у 2018-ім роцї з ініціатівы одборників у практічній і теоретічній области театру. Тота ініціатіва хоче споїти особности словацькой театралной културы з области творчости, театралной наукы, крітікы і історії.

Премія Академії театралных творцїв за театралну інсценацію є проєктом, котрый тот рік орґанізує ся першый раз і цїлём є рефлектовати творчость вшыткых театрів на Словакії, котры о то в даній сезонї проявлять інтерес. Не є анкетов, в котрій ся голосує, фунґує на основі добровольного приголошіня. Вшыткы театры і театралны зґрупованя годны приголосити єдну, припадно веце пєс, подля того, кілько премєр в сезонї планують.

В першім колї мусять вшыткы членове комісій, котры суть зряджены про тоту премію, посмотрити вшыткы приголошены інсценації в реґіоналных округах, котрыма суть Братїслава І. і ІІ., Запад, Середина і Выход, і выбрати 2 аж три інсценації, котры номінують на Премію Академії. В другім колї верьховна комісія по посмотрїню вышткых номінованых пєс выголосить єдну, котра стане лавреатом.

В першім річнику было приголошеных 27 театрів із 40-ма пєсами. В окрузї Выход ся до номінацій дістав Драматічный колектів Штатного театру Кошіцї з пєсов Адамовы ябка, мадярьскый Театер Талія з Кошіць з пєсов Терор, і русиньскый Театер Алексаднра Духновіча з Писковіском.

Позітівна крітіка

Писковіско русиньского театру має на сайтї Академії театралных творцїв позітівне оцїнїня. О пєсї пишуть як о вырівнаній, штілово „чістій“ інсценації, котра дає публіцї імпулзы на роздумованя о важности людьской комунікації.

За проблематічный момент крітіци беруть надвязаня прямого контакту з публіков, котрый є „штіловым переломом“. Геречкы в серединї інсценації роблять анкету меджі публіков, котра подля членів журї не є потребна.

Наперек тому пєсу Пісковиско беруть за інсценацію, котра „має елементы модерности, акторьской чістоты і продуманой режійной концепції. Є свіже, нерушыве і естетічне. Має єднозначны атрібуты театралности. То путь, як дістати молоду публіку до театру,“ продовжує ся на сайтї Академії о пєсї.

Валчаково Пісковиско є позітівно оцїнёване і вдяка факту, же є в „контекстї діятельства споминаного драматічного колектіву (Театру Александра Духновіча, поз. ред.) унікатным інтерпретачным дїлом, бо колектів під веджінём режісера Браня Мазуха, в єдній особі і высокошкольского педаґоґа Театралной факулты Академії музичных умень в Празї, презентує особистый тіп інтерпретації драматічного тексту.“

Лавреат першой Премії Академії театралных творцїв буде выголошный 13-го децембра 2019-го року почас святочного ґалавечора в Синім салонї Словацького народного театру.

Петро МЕДВІДЬ, ЛЕМ.фм