6. 12. 2018: Позваня на выставку Сакрална тематіка у творчости Енді Варгола

Музей модерного уменя Енді Варгола в Меджілабірцях, Сполочность Енді Варгола і Містьскый центер културы в Левочі (ту бы мала быти выставка) позывають Вас на выставку Сакрална тематіка у творчости Енді Варгола, кураторами котрой суть: Др. Михал Бицко, ПгД., Мґр. Мартін Цубяк і Мґр. Кармен Ціліпова. Выставка буде отворена од 21. децембра 2018 до 27. януара 2019.

Концепція выставкы є у візуалній думцї і темі о тайностях Енді Варгола. Як глубоко запертый до себе чоловік не презентовав свою віру, навщіву церьквей, стрїчу з папом римскым Іоаном Павлом ІІ., свою анґажованость у підпорї різных харіт і іншы філантропічны дїла перед своїма найблизшыма. Выставка вказує на тот розмір умелця і творять ю штири підтемы. В першій ся перелинають – тема впливу Юлії Вархоловой на творчость свого сына, тема Рождества і перед поп-артова творчость і твір Звістованя, што є передвістков приходящіх роздественных свят. На тоту експозіцію надвязує іншталація творів з портфолія „FLOWERS Black and White‟ (Квіткы чорне і біле), котра є силно позначена смертёв умелцёвой матери і змірёванём ся з тов стратов. Третїм великым тематічним округом є презентація творчости Енді Варгола, яка є іншпірована Послїднёв вечерёв од Леонарда да Вінчі. Послїдню часть выставкы творить „хрест‟ як главный мотів в умелцёвій інтерпретації, але і „хрест‟ гробів на цінтерю в Миковій, одкы походили Ендіёвы родічі.

Выставка має быти тихым засталїнём ся, задуманём, проявом покоры в часї, кедь ся тїшыме з народжіня нашого Спасителя, єдночасно з притомности вшыткых нашых близкых, але і спомины на тых, котры овпливнили наш жывот, але уж не засядуть за святочный стіл.

Тота выставка є єдночасно позванём до сталых експозіцій Музею модерного уменя Енді Варгола в Меджілабірцях