6. 12. 2018: Выникла нова єпархія в Руськім Керестурї

  • Першый єпарха новой Єпархії св. Николая із центром в Руськім Керестурї – владыка Дюра Джуджар.

    Першый єпарха новой Єпархії св. Николая із центром в Руськім Керестурї – владыка Дюра Джуджар.

  • Погляд на вежу Катедралного ґрекокатолицького собору св. Николая в Руськім Керестурї на Войводинї (Сербія).

    Погляд на вежу Катедралного ґрекокатолицького собору св. Николая в Руськім Керестурї на Войводинї (Сербія).

У четверь, 6-го децембра 2018-го року, Папа римскый Франціск підняв Апостольскый екзархат про ґрекокатоликів у Сербії і Чорній Горі на Єпархію св. Николая із центром в Руськім Керестурі. Першым єпархом став дотеперішнїй екзарха владыка Дюра Джуджар.

Екзархат выникнув по роспадї Югославії

Апостольскый екзархат про вірників візантійского обряду, котрый днешнїм днём, на праздник св. Николая за новым календарём, став єпархіёв, выникнув у 2003-ім роцї, по роспадї Югославії, коли быв вынятый із Крижевацькой ґрекокатолицькой єпархії. Крижевацька єпархія до 2001-го року мала під собов вшыткых ґрекокатоликів на теріторіях бывшой Югославії.

Од 2013-го року змінила ся назва екзархату на Апостольскый екзархат у Сербії. Катедралным собором од 2003-го року є Церьков св. Николая в Руськім Керестурї, котрый є і головным центром войводиньскых Русинів. Нова єпархія має 21 парохій і коло 22 тісяч віруючіх. Вірниками новой єпархії суть главно Русины, но мож меджі нима найти і Хорватів ці Румунів. Адміністрація новой єпархії буде в Новім Садї, де дотеперь была і адміністрація екзархату.

 

Владыка Дюра Джуджар

Першый єпарха Єпархії св. Николая владыка Дюра Джуджар народив ся у 1954-ім роцї в русиньскім селї Дюрдёв, на теріторії днешнёй Сербії. Середню освіту в малій семінарії здобыв у Римі, потім там далше продовжовав у філозофічно-богословскых штудіях. У 1985-ім роцї здобыв у Римі докторат із выходного канонічного права.

Рукоположеный на священика быв у 1980-ім роцї як священик Крижевацькой єпархії. 15 років робив на Конґреґації про выходны церькви в Римі. У 2001-ім роцї быв призначеный епіскопом-помічником Мукачівской ґрекокатолицькой єпархії і рукоположыв го на єпіскопа pапа римскый Іоан Павел ІІ. По заснованю екзархату в Сербії у 2003-ім роцї став ёго першым екзархом. У 2016-ім роцї быв владыка Дюра Джуджар выбраный за віцепрезідента Меджінародной епіскопской конференції святых Кіріла і Методія, в котрій суть католицькы єпіскопы Сербії, Чорной Горы, Македонії і Косова.

Петро МЕДВІДЬ, лем.фм

Script logo