6. 12. 2018: Інавґурація новых прибытків до експозіції ММУЕВ

14. децембра 2018 од 14.00 год. в експозіції Музею модерного уменя Енді Варгола (ММУЕВ) в Меджілабірцях одбуде ся інавґурацію новых прибытків до експозіції ММУЕВ під назвов Інавґурація портфолій Енді Варгол:„Flash – November 22“ (Блеск – Новембер 22) і Кейт Гарінґ: „Flowers‟ (Квіткы).

Портфоліё творів „Flash‟од Енді Варгола творить 11 скрінпрінтів, котре передає події перевзяты з новинок і телевізії в одношіню к атентату на америцького презідента Дж. Ф. Кеннедія. Атентат шоковав цїлый світ а Енді Варгол передає острый погляд на найвеце шокуючі справы або сімболы од атентату 22. новембра 1963 аж по день погребу 25. новембра 1963. Іншпіраціёв про нёго не быв самый атентат, але величезный навал пресы і высыланя публіцістікы, бо Варгола фасціновала емоціонална сила медій. У своїх єденадцятёх творах пробадав травнатічны скушености з верейного атентату на Кеннедія, бо Америчане ся з тыма емоціонално набитыма образами стрїчали скоро каждый день. Найперше усміваючій ся Кеннеді зо женов у Далласї тїсно перед выстрілом, потім Лі Гарвей Освалд на поліцайній станїцї в Далласї, Освалдова пушка ці знамы высловы в аґентурных справах – ай тоты сітуації захопив Варгол у своїм портфолію.

Портфоліё „Flash“ є Варголовым унікатным візуалным документом єдной із наслїдобанїшых подій 20. стороча. Дане портфоліё є унікатне і тым, же на Словакії іщі николи не было выставлене.

Портфоліё творів „Flowers‟ од Кеіта Гарінґа было єдно з послїднїх, вытвореным перед тым, як передчасно автор вмер. Є то серія пятёх монументалных творів з тематіков квітів, в котрых ся вернув до періоду своїх першых ґраффітів і таков вытварнов ретроспектівов охабив чісты лінії своїх попереднїх творів у наслїдку вырінёваня ся з узкостёв чоловіка, котрый знає, же ёго жывот поступно ся кінчіть. Одквапкаючі фарбы з образів, їх перерываня і контрастность в комбінації з гравов композіціёв квітїв доконало репрезентують став, котрый Кейт Гарінґ одчував, кідь вмерав на „АІDS“.

Ёго жывот ся скінчів 16. фебруара 1990 у віцї 31 років. Належав, подобно як Жан-Мішел Basquiat, з тым умелцём, котрый жыв коротко, але крічав міцно. Ёго самобытный штіл творчости має доднесь іконічный статус і ёго поп-арт є вызнамнов іншпіраціёв ай в сучаснім уменю.

Подобно як Варголове портфоліё „Flash“ і Гарінґове „Flowers‟ мають на Словакії свою выставну премєру, а то в Музею модерного уменя Енді Варгола в Межілабірцях. ... „panta rhei“.

Мґр. Мартін ЦУБЯК, куратор