6. 11. 2020: Вмерла русиньска малярька Зузана Осавчукова Гапакова

Як інформовала родина, дня 31-го октобра 2020-го року добило сердце русиньской малярькы Зузаны Осавчуковой Гапаковой. Вмерла у віцї 86 років.

Доц. ПгДр. Зузана Осавчукова, к. н., з дому Гапакова, народила ся 18-го септембра 1934-го року в Пінківцях, в окресї Собранцї.

Скінчіла Руську ґімназію в Гуменнім, пак абсолвовала комбінацію вытварна выхова і російскый язык на Высокій школї педаґоґічній в Братїславі. Зо зачатку учіла на Середнїй педаґоґічній школї в Пряшові, пізнїше на Катедрї вытварной выховы Педаґоґічной факулты Універзіты Павла Йозефа Шафарика в Пряшові, одкыль у 1991-ім роцї одышла до пензії. В тім самім роцї была прията до Словацькой вытварной унії.

Єден час, іщі перед 1989-ым роком, коли Русины не мали властну пресу, робила і в редакції україньского журналу Дружно вперед. Зузана Осавчукова Гапакова написала учебникы малёваня про першы і другы річникы учітельского нампряму і дакілько далшых высокошкольскых учебників про штудентів педаґоґікы о естетіцї і малёваню. У 2014-ім роцї выдала моноґрафію о своїм братови Штефанови Гапакови, котрый быв так само вызначным русиньскым малярём.

В творчости малярькы доміновав пейзаж, пастел і оліёвы фарбы, творила закутины ці букеты квітїв. Із їй творів мож спомянути наприклад На дворї в Дрєніцї, Послїднї хрізантемы, Спішскый сужет, Розквітнута яблінь, Пусте Поле ці Іновецькый хотарь. Робила і портреты. Мала много выставок, по выникнутю Словацького народного музея – Музея русиньской културы в Пряшові выставльовала і там.

Ґрекокатолицькый погріб Зузаны Осавчуковой Гапаковой одбыв ся в четверь, 5-го новембра 2020, о 12.00 год. на цінтерї в Нерешах.

Петро МЕДВІДЬ, лем.фм, жрідло фотоґрафії: rusynacademy.sk, языкова управа: ред. АРК в СР.