6. 11. 2020: Буковскому при тестованю хыбовала двоязычность

Через вікенд, 31-го октобра і 1-го новембра 2020-го року, на Словакії проходило цїлодержавне тестованя антіґеновыма тестами на COVID-19. Словацька влада так хотїла ідентіфіковати інфекчных людей, котры наступили до повинной карантены, і тым знижыти розшырёваня коронавірусу і наростаня денных чісел хворых.

На тестоваваню взяло участь понад 3,6 міліона людей, Словакія має притім коло 5,5 міліона жытелїв. Іти ся тестовати не мусили люди над 65 років і дїти до 10 років віку. Тестованя окоментовав і уповномоченый влады Словацькой републікы про народностны меншыны Ласло Буковскый, котрый підкреслив, же двоязычность мусить быти при такых вынятковых сітуаціях істиннов.

Фалат роботы, но хыбовала двоязычность

Одповідны орґаны на боцї державы і містных самосправ выконали величезнну намагу, жебы успішно зреалізовало ся 1-ше коло цїлодержавного тестованя на COVID-19, но на многых місцях были порушены меншыновы языковы права, написав на соціалній сітї Facebook Буковскый, на што ся одкликала пресаґентура TASR.

„Я барз скламаный, же много сел і міст, і такы, в котрых членове народностных меншын творять векшыну, на тоту законну повинность забыло,“ написав уповномоченый, котрый єдночасно подяковав самосправам, котры інформації ку тестованю мали і в меншыновім языку.

„Двоязычность мусить быти істиннов при такых вызначных подіях, коли поданём потребных інформацій даме вклад ку безпечности і охранї жывотів нашых жытелїв,“ підреслив Буковскый.

В русиньскых окресах і друге коло тестованя

Влада Словацькой републікы хотїла наперед зробити цїлодержавне тестованя жытелїв почас двох по собі слїдуючіх вікендах. По першім колї і вдяка рекомендаціям одборньків владный кабінет змінив своє рїшіня.

Тестованя буде в днях 7-го і 8-го новембра проходити лем в тых окресах, де было зіщеных веце як 0,7 процента позітівных із вшыткых тестованых в данім окресї. Меджі такы окресы належать главно тоты, котры суть на северї Словакії. В тім чіслї і окресы, в котрых є русиньске населїня.

Спомеджі них можеме спомянути окрес Стара Любовня, котрый мав у вікендовім тестованю 2,8 процента інфікованых, Бардеёв із 1,67 процентами, Свідник із 1,32 процентами, Стропків із выслїдком 1,19 процента, Меджілабірцї, де было 1,3 процента, Свідник із 1,8 ці Гуменне з 1,81 процентами інфікованых людей.

Петро МЕДВІДЬ, жрідло фотоґрафії: Місто Філяково, языкова управа. ред. АРК в СР.

Script logo