6. 11. 2019: Половьна меншыновых самосправ не інформує о языковых правах

Уповномоченый влады СР про народностны меншыны Ласло Буковскый (на фотцї) про ТАСР повів, же што до языків народностных меншын, мусять вшыткы орґаны самосправы інформовати своїх жытелїв, якы суть їх языковы права.

Аж половина тзв. меншыновых самосправ не інформує своїх жытелїв о їх правах хостованя языка меншыны. Повів то 14-го октобра 2019-го року про ТАСР уповномоченый влады СР по робочій стрїчі зо старостами меншыновых сел в окресї Меджілабірцї.

„Можеме повісти, же села і орґаны самосправы затля не порозуміли, в позітівнім смыслї слова, же є ту даякый закон, котрый є платный і діючій 20 років, а при аплікації, нажаль, сьме даґде в половинї,‟ згорнув выслїдкы тогорічной Справы о аплікованюї языкового закона до практікы Буковскый із тым, же холем дакус суть лїпшы, як перед двома роками. Додав, же інформації о дотримованю языкового закона, бы мали самосправы публіковатаи на урядных таблах, або на добрї видїтелнім місцї в урядї ці перед урядом, або на вейбсайтї.

Подля ёго слов, скором 50 процент сел без родїлу на окремы языкы, тото не решпектують. Высловив ся і о абсенції двоязычных урядных формуларів, главно в ромскім, русиньскім і україньскім языку. Цїлём сучасных стрїч з представителями самосправ є подля Буковского нелем інформованя о недостатках, але главно дати методічну і одборну поміч у формі термінолоґічных словників і языковых робочіх ґруп в рамках ёго уряду. Далшым кроком, котрый хоче уряд уповномоченого в рамках языкового закона реалізовати, є, же вызве вшыткых веце як 600 меншыновых сел на Словакії, жебы зліквідовали конкретны недостакы до становленого терміну.

„Самосправы нас будуть повинны інформовати, до якой добы даны недостакы зліквідують. В припадї, же не дійде до ліквідації недостатків, кедь буде потребне, дістанеме ся і ку даякым штрофам,‟ додав Буковскый з тым, же сакціонованя бере за послїднє рїшіня, як досягнути направу.

-ак-, здрой: Народны новинкы Інфо Русин č. 19/2019.