6. 10. 2021: Словакія припоминать собі День героїв Карпато-дукляньской операції

Першый раз памятный день припоминав ся у 2016-ім роцї.

На Словакії є 6-ый октобер в календарї памятным днём. Припоминать ся День героїв Карпато-дукляньской операції, котра стала єднов із найкырвавішых операцій Другой світовой войны.

Перед 77 роками якраз нёв зачало ослободжованя теріторії днешнёй Словакії од фашістічных окупантів. Під назвов День героїв Карпато-дукляньской операції 6-ый октобер першый раз припонинав ся у 2016-ім роцї. До року 2015 мав назву День жертв Дуклї, і до 1993-го року быв знамый під назвов День Чехословацькой народной армії.

Святкованя на Дуклї і в Свіднику

Як каждый рік, і днесь, 6-го октобра 2021-го року, на пєтных місцях на Дуклї і у Свіднику, де є памятник армадного ґенерала Людвіка Свободы і памятник совєтьскых героїв, одбыли ся пєтны акты, котры зачали о девятій дополудне.

На них были участны представителї державы, краю і самосправы, меджі іншым предеда Народной рады Словацькой републікы Борис Коллар, міністер обороны Ярослав Надь ці председа Пряшівского самосправного краю Мілан Маєрьскый.

День, коли граніцю перекрочів Свобода

Карпато-дукляньска операція, котра была частёв шырше ведженой Выходокарпатьской операції, зачала рано 8-го септембра 1944-го року.

Вояци Першого чехословацького армадного корпусу в СССР під веджінём ґенерала Людвіка Свободы перекрочіли граніцї Чехословакії в просторї Дукляньского перевалу 6-го октобра 1944-го року. При тій нагодї святкує ся памятный день.

Операція скінчіла 28-го октобра 1944-го року і до історії записала ся як найвекша і найкырвавіша битва лінії выходного фронту, котра одбыла ся на теріторії днешнёй Словакії.

В цїлій Выходокарпатьскій операції, під котру належала Карпато-дукляньска і Карпато-ужгородьска операція, стратили войска Червеной армады 26 тісяч вояків, 84 тісяч было зраненых. Першый чехословацькый армадный корпус в нїй пришов о 1630 вояків і понад 4000 їх было зраненых. Страты на боцї націстічных войск были веце як 50 тісяч мертвых і зраненых.

Памятник на Дуклї

Домінантов народной културной памяткы Дукляньске битевне поле є Памятник чехословацького армадного корпусу збудованый у 1949-ом роцї подля пропозіції чеського архітекта Йосефа Ґруса.

При нагодї 70-ой рочніцї Карпато-дукляньской операції до ареалу дали копію оріґіналной скулптуры чехословацького вояка, котра там была первістно наіншталована, кедьже почас комуністічного періоду там намісто нёй была дана інша скулптура од Яна Кулиха, яка теперь находить ся в змодернізованых просторах выглядковой вежі Дукля

Петро МЕДВІДЬ, ЛЕМ.фм. Ґрафічна і языкова управа: ред. АРК в СР. Жрідло фотоґрафії: Ярослав Надь.

 

Script logo