6. 10. 2020: Ондавка має по вікендї самосправу. Припоїня до друго села не буде

Село Ондавка Бардеёвского окресу ся суботнїма доповнюючіма вольбами до орґанів містных самосрпав, в котрых собі аж 48 сел на Словакії, якы не мали зволену повну функчну самосправу, выберали своїх кандідатів, сохранила од того, жебы была приєднана до іншого села.

Міністерство внутра Словацькой републікы притім минувшый рік уж ани не раховало з іншов алтернатівов як з тов, же Ондавка як окреме село з мапы счезне. Ондавка собі в двох по собі ідучіх вольбах не знала зволити ани старосту, ани посланцїв сільского заступительства. Раховало ся з тым, же село, котре было довгый час нефункчным, буде приєднане до Бехерова або Вышнёй Полянкы.

Зволили старосту і трёх посланцїв

Ондавка, котра має днесь 15 жытелїв, ся дословно захранила на послїдню хвілю. Як інформовала пресаґентура TASR, по вольбах, котры проходили 3-го октобра 2020- го року, новов старостков стала Луція Васілеґа, котра кандідовала за партію Most-Híd. Окрем того собі Ондавчане зволили і трёх посланцїв сільского заступительства.

„Остатнїй бывшый староста абдіковав із функції і одвтогды были повторяно выголошены доповнюючі вольбы до орґанів самосправы, причім ся не нашов жаден кандідат, аж дотеперь,“ додав.

Ондавка так натеперь не досягне нехоченого первенства, бо як довгодобо нефункчне село бы была першым селом, на котрім бы ся зреалізовав процес припоїня до іншого села. Процес быв притім уж од минувшого року зачатый.

Проблемы не кінчать

Проблемы зволїнём старосты і посланцїв не кінчать. Ондавка мала довг, банковый рахунок быв заблокованый екзекутором. Село ся теперь буде мусити фінанчно консолідовати. То бізовно не буде легкый процес, кедьже в нїм жыє лем 15 людей і розрахунок села залежыть о чісла жытелїв.

В остатнїм часї, коли село не мало функчну самосправу, ся о основны дїла старав головнї Бехерів, котрый помагав Ондавцї наприклад із тым, жебы мали вывезеный одпад. Якраз Бехерів быв горячім кандідатом, до котрого бы ся Ондавка припоїти, покля бы зістала нефункчным селом і завершыв бы ся процес злучованя сел.

Вольбы і в далшых русиньскых селах

Доповнюючі вольбы до орґанів містных самосправ проходили в суботу іщі і в далшых двох русиньскых селах – у Варадцї і Маківцях.

В Маківцях Стропківского окресу выберали старосту. Маківчане вырїшовали меджі двома кандідатами. Старостков стала Гелена Штефанцёва, котра кандідовала за партію Sloboda a Solidarita. В селї проходили доповнюючі вольбы на основі того, же попередній староста вмер.

В селї Варадка Бардейовского окресу могло голосовати 169 людей. Выберав ся староста. На голосованю брало участь 51 волічів. Старостом став Андрій Куримскый, котрый быв єдиным кандідатом.

Петро МЕДВІДЬ, ЛЕМ.фм, языкова управа: ред. АРК в СР

Script logo