5. 9. 2018: В Театрї А. Духновіча в Пряшові зачала 73. сезона

3. септембра 2018 Театер Александра Духновіча (ТАД) у Пряшові вступив до своёй 73. сезоны. При єй отворїню директор ТАД Маріан Марко высловив пересвідчіня, же своїма інсценаціями їх театралам ся подарить ословити публіку вшыткых віковых катеґорій. „Вірю, же будеме успішны і позерателї заповнять просторы на нашых выступлїнях із грами,‟ повів.

Штарт до новой сезоны є про ТАД, як єдиный театер на Словакії, што грає в русиньскім языку, острый, бо уж на октобер приправуєме премєры двох інсценацій – класічной гры словаськой драматічной творчости Обіцянкы од Йозефа Ґреґора Таёвского (премєра 5. окробра) у режії гостюючого Матуша Ольгы і авторьского тексту Домовина в режії гостюючой Адріаны Тотіковой.

Окрем премєры гры Марка Кропивницького в україньскім языку По ревізії в режії Андрія Романія, ТАД буде мати у своїм репертоарї з попереднїх сезон 15 інсценацій (viac na www.divadload.sk).

М. Марко єдночасно підкреслив, же почас скінченых театралных вакацій подарило ся в будові, котру має ТАД у справі і дякуючі зряджователёви ТАД, котрым є Пряшівскый самосправный край, зробити реконшткію, а то вымінити окна, радіяторы, поправити стрїху і будову затеплити нововв фасадов.

Драматічный колектів ТАД, котрого умелецькым шефом є Любомір Міндош, выступить 24. октобра з гров Тяпаковцї (режія М. Ольга) на фестівалї Театралный Спіш, іде о десютый річник перегляду інсценацій словацькых театрів.

ТАД має свої выступлїня штандартно в Пряшові у середу од 19.00 год. а за своїма позерателями ходить каждый вікенд по Пряшівскім і Выходословацькім краї.

Осиф ЮРЧІШИН, новый драматурґ ТАД, контакт: 0905 328 633