5. 8. 2024: Была 44. Лемківска Ватра на Чужыні

В Михалові на Нижнім Шлеску загорила 44. Лемківска Ватра на Чужыні, якой орґанізатором было Стоваришыня Лемків. Проґрам зачав у суботу. Першыраз почестна функция положыня огня припала трьом Фльоринчанам – теперішнім і бывшым жытелям Михалова: Іванови Дзядикови, Михалови Канючкови і Осифови Лучківцьови. На сцені было мож видіти такы ансамблі як Серенча, Бурян і Демай. Суботній проґрам зачав о 12.00 год. Выступили м.ін. Лемко Тавер, Надія, Інтраде і Лемкус. Специяльныма гістми были два ансамблі з Пряшівской Руси, якы запрезентовали автентичный русиньскій фольклор з Уличской Долины. То Полонина і Стужыця, якы в рамках свого выступліня вказалит і обряд русиньского весіля. В суботу было передвиджено і шор конкурсів, спортовых змагань і інчых акций. Припоминаме, што окрем концертів в суботнім проґрамі Ватры было запляновано і стрічы – доповіди, якы будут проходити в Шатрі Бесід. О своім проєкті «Біла Вода – Біль непамяти» оповіли краківскы студенты Домініка Цєпляк і Каміль Федериґа. Пак прелекцию выголосил Даміян Новак з Музею Бічской Землі. Темом была доля церкви на Лемковині од ХІХ до ХХІ ст. Выклады, а при тым і інчы свобідны бесіды проходили в специяльно зрыхтуваным шатрі, котре напевно учасници нашли на ватровиску. Не бракло і нас – редакторів радия ЛЕМ.фм. Як каждого рока было придбано цікавы лемківскы книжкы, цедечка, кошелькы і інчы ґаджеты.

Ленка СТЕФАНОВСКА, ЛЕМ.фм.

(Публікуєме в оріґіналї – лемківскім варіантї русиньского языка.)