5. 6. 2024: Studium Carpatho-Ruthenorum 12-ый раз привітать штудентів

В неділю, 9-го юна 2024-го року, в Пряшові святочно одкрыє ся Studium Carpato-Ruthenorum 2024 – 12-ый рочник Меджінародной лїтнёй школы русиньского языка і културы, котру орґанізує Інштітут русиньского языка і културы Пряшівской універзіты в Пряшові.

Пряшівска універзіта в Пряшові, в рамках котрой дїє Інштітут русиньского языка і културы, є єдинов універзітов у світї, котра орґанізує лїтнї школы русиністікы. Зато на Studium Carpato-Ruthenorum все зыйдуть ся лекторы і штуденты нелем із Словакії, але споза граніць.

Загранічны штуденты творять векшыну

Лїтню школу русиністікы на Пряшівскій універзітї дотеперь абсолвовало 235 штудентів, з того 155 было загранічных, котры пришли з такых країн як Нїмецько, Австрія, Швейцарія, Україна, Польща, Чеська републікы, Булґарія, Сербія, Споєны штаты Америкы, Канада, Арґентіна, Кітай, Хорватія, Румунія, Великобрітанія і Японія.

Не іде притім лем о людей, котры мають русиньске походжіня і хотять мати веце знань з русиньского языка і културы, але приходять і штуденты, котры мають професіоналны інтересы, наприклад в области славістікы.

Тот рік буде мати літня школа довєдна 23 штудентів, з чого 19 є загранічных. Загранічны штуденты Studium Carpato-Ruthenorum 2024 прийдуть із Споєных штатів Америкы, Канады, Польщі, Україны, Хорватії, Сербії і Чеськой републікы.

Курзы з лекторами домашніма і загранічныма

В рамках лїтнёй школы каждый рік проходить навчалный процес в двох языках – по русиньскы і по анґліцькы, і про штудентів суть приготовлены на тот тритыжднёвый період три основны курзы.

Курз історії карпатьскых Русинів тот рік веде по русиньскы доц. Володимир Фенич, к. н. із Ужгородьской націоналной універзіты, по анґліцькы проф. Др. Павел Роберт Маґочій із Торонтьской універзіты.

Курз русиньского языка буде в русиньскім языку учіти ПгДр. Кветослава Копорова, ПгД., унів. доц. з Інштітуту русиньского языка і културы ПУ. Про тых, котры будуть хотїти основы русиньского языка здобыти в авґліцькім языку, буде лекції переподавати Мґр. Натан Маркс, Пг.Д. із Оклагомской універзіты в США, котрый так само є абсолвентом попереднёй школы Studium Carpato-Ruthenorum.

На Курз русиньской етноґрафії тот рік суть покликаны доц. Мґр. Валерій Падяк, к. н. із Інштітуту русиньского языка і културы ПУ, котрый буде учіти по русиньскы, і Мґр. Катарина Бабчакова, ПгД. із Народного освітнёго центру в Братїславі, яка буде вести анґліцьку верзію курзу.

Окрем того участны дістануть і лекції о русиньскій літературі, де знова буде переподавателём на русиньскім языку Валерій Падяка, на анґліцькім асоц. проф. Др. Ніколас Купеньскый із Академії авіачных сил США.

Три тыжднї лїтнёй школы

Лїтня школа русиньского языка тырвать три тыждні, тот рік закінчіть ся святочным передаваньом діпломів о абсолвованю в пятніцю, 28-го юна.

Почас школы про штудентів суть приготовлены і супроводны події як творчі варштаты, навщівы музеїв і історічных памяток повязаных з Русинами і русиньсков културов, ці навщіва Театру Александра Духновіча, на сценї котрого будуть годны тот рік відїти пєсу Фараоны.

Так само почас Studium Carpato-Ruthenorum 2024 першый раз штуденты в рамках проґраму навщівлять будинок Стоваришыня Руска Бурса в Ґорлицях, де будуть годны познакомити ся наприклад і з роботов нашого радія а порталу lem.fm.

Петро МЕДВІДЬ, ЛЕМ.фм, языкова і ґрафічна управа: АРК в СР.