5. 6. 2019: Лемкiвскій Родинный Фестин

Директорка Основной Школы в Радваницях, што ся находят недалеко Польковиц на Нижнім Шлеску, Боґуславa Німаш, та учытелька лемківского языка, Доротa Максимчак, разом з родичами ученників лемківского языка запрaшaют 15. червця/юнія 2019 р. o 16.00 год. нa Лемкiвскій Родинный Фестин, якій пройде при православній церкви св. Димитрия Солуньского в Бучыні.

Фестин одбуде ся завдякы підпорі пароха церкви в Бучыні, о. Юрия Омелянюка, котрый дає пляц, і фінансовій дотациі з Малого Ґранту Нижнього Шлеска для неформальной лемківской ґрупы. Подія пройде в рамках проєкту «Тот світ не загынул – зовут іх Лемками».

Орґанізаторы Лемкiвского Родинного Фестину сердечно запрашают на подію вшыткых родичів з дітми. Мают тіж надію, што на стрічы не бракне баб, дідів і сусідів.

На фестині зо своім артистичным проґрамом запрезентуют ся діти, котры берут участ в лекциях лемківского языка, вкажут і свій проґрес в навчаню рідной бесіды і знаню лемківской культуры і істориі. Окрем артистичной і едукацийной части передвиджена є выстава малюнків з лемківском темом, якы были творены наймолодшыма од початку шкільного рока.

В рамках того самого проєкту лемківскы діти з ґміны Радваниці і іх родиче підут уж 8. червця/юнія 2019 р. на прогулку до Теплиц.

Фото- і авдийореляциі з обох подій будут доступны по закінчыню проєкту, а уж днеска смотрте на промоцийну акцию, яку вели нашы діточкы серед парохіян бучыньской церкви.

Мирко ВОРГАЧ, ЛЕМ.фм

(Публікуєме в оріґіналї – лемківкім варіантї русиньского яазыка.)