5. 6. 2019: Юбілейный річник Studium Carpato-Ruthenorum
В недїлю, 9-го юна 2019-го року, святочнов рецепцієв у пряшівскім пензіонї „Átrium‟ одкрыють юбілейный 10-ый річник Меджінародной лїтнёй школы русиньского языка і културы Studium Carpato-Ruthenorum 2019.
Тот рік будуть здобывати знаня з русиністікы штуденты із 5-ёх держав. В понеділёк будуть мати свої першы лекції.
Лекції по русиньскы і по анґліцькы
Тритыжднёвый едукачный проєкт, котрый на Пряшівскій універзітї в Пряшові реалізує Інштітут русиньского языка і културы Пряшівской універзіты, є заміряный на навчаня русиньского языка, історії, літературы, културы і етноґрафії карпатьскых Русинів. Лекції з тых дісціплін паралелно забезпечують ся в русиньскім і анґліцькім языку посередництвом загранічных і домашніх высокошкольскых педаґоґів.
Як інформовала нашу редакцію Анна Плїшкова, директора Інштітуту русиньского языка і културы, тот рік будуть чітати лекції із історії карпатьскых Русинів Павел Роберт Маґочій, котрый буде їх чітати по анґліцькы, і Володимір Фенич – по русиньскы. Язык буде учіти Кветослава Копорова в русиньскім языку, по анґліцькы будуть слухати участници лекції з той дісціпліны од Марека Ґая і Патріції Крафчік. На етноґрафію по русиньскы быв покликаный Валерій Падяк, по анґліцькы їй буде передавати Патріція Крафчік.
Тот рік на лїтню школу приголосило ся довєдна 20 штудентів, з котрых є шість домашніх і остаток зо Споєных штатів Америкы, Нїмецька, Чеськой републікы і Україны.
Богатый супроводный проґрам
В рамках лїтнёй школы є про участників каждый рік традічно приготовленый і богатый супроводный проґрам. До нёго належать навщівы културных подій ці екскурзії в реґіонї северовыходной Словакії.
Навщівлять наприклад Музей модерного уменя Енді Варгола, Словацькый народный музей – Музей русинськой културы, будуть годны іти на театралну пєсу до Театру Александра Духновіча, відїти деревяны церькви, выберуть ся і на Лемковину.
190 людей за 9 років
Меджінародна лїтня школа русиньского языка і културы Studium Carpato-Ruthenorum є єдина своёй сорты на світїі, на што є Пряшівска універзіта в Пряшові горда.
За попередніх девять річників брало на лїтній школї участь 190 штудентів, котры были зо Словакії, Споєных штатів Америкы, Україны, Канады, Польщі, Мадярьска, а і далшых держав світа як Булгарія, Сербія, Арґентіна ці Італія. З тогорічныма штудентами їх буде вже 210.
10-ый річник Меджінародной ліїнёй школы русиньского языка і културы Studium Carpato-Ruthenorum 2019 із публічных средств підпорив Фонд на підпору културы народностных меншын.
Петро МЕДВІДЬ, ЛЕМ.фм
