5. 4. 2019: Осиф КУДЗЕЙ: Охрана, Узнаня, Заміряня, Нотес (Байкы)

Охрана
В єднїм домі близко Странян
просить ся сын свого няня:
„Чом то може в нашім штатї
муж лем єдну жену мати?“

„По свадьбі ся дізнаш, Іване,
же чом є то заказане.
Каждый з нас, женатых хлопів,
такой по свадьбі похопив,
же тот закон зато ту є,
бо нас мужів охранює.“

Тоты хлопи, што суть протїв,
най поуважують о тім,
же три жены – то три свекри,
перед нима бы ся не скрив. 

Узнаня
В братїславскім клубі Здар
быв конкурз на Суперстар.

Як доспівав пан Петровіч,
похвалив ся Габерови:
„Каждый, хто чув моє соло,
гварить, же мам такый голос,
же з ним можу до оперы.“

„Так є,“ чує од Габеры,
„вы там можете наісто,
но кеідь сі купите листок!“

Ці є гірша річ даяка,
як похвала од дурака?
Є. А є гірша омного – 
є то высміх од мудрого.

Заміряня
Як рано в селї Терекы
пришла дївка з діскотекы,
отець єй не пустив спати
і став на ню барз кричати.

„Скламала єсь ня, Дорото,
што то мать значіти тото?!
Хыжа ся нам розпадує,
авто уж рік не штартує,
вода капкать з когутика,
скратує нам електрика... 
А слечна Дорота моя
собі найде діскджокея!!!“

І в нашій модернїй ерї
стародавны ґеста – 
дїтям глядаме партнерів
подля своїх представ.

Нотес
У касарнях за Гаваём
повідать вояком маёр:
„На днесь мам про вас, вояци,
дакус веце інформацій,
а кедьже знам, же сьте пака,
моя рада буде така:
Кому ся мозоґ зашывать
а такой вшытко забывать,
бо є дурнїшый як баран, 
най сі раз-два од чатаря
выфасує грубый нотес!
Я їх мам аж три, посмотьте...“

Чоловіка ірітує,
кедь шеф, што му розказує,
сі о собі пышно думать,
же мать найвеце розума.
Притїм тот на низшім постї
мать в собі веце мудрости.