5. 3. 2019: Вєдно з юбілеём Педаґоґічной факулты ПУ славиме і юбілей зачатку навчаня русиньского языка на нїй в академічнім роцї 1999/2000

Треба припомянути, же 70-річный юбілей дїятельства Педаґоґічной факулты ПУ (днесь єдной із 8-ох факулт ПУ) святкуєме і мы, Русины. В академічнім роцї 1999/2000 якраз штуденты штудійного проґраму Учітельство про І. ступінь основной школы той факулты зачали ся першыраз в історії учіти русиньскый язык у розшыреній фoрмі навчаня. Одборным ґарантом того навчаня быв доц. ПгДр. Василь Ябур, к. н.

Ґестором першой формы высокошкольского навчаня русиньского было нововзникнувше 1. септембра 1998 Оддїлїня русиньского языка і културы тогдышнёго Інштітуту народностных штудій і чуджіх языків.

Першыма робітниками уведженого оддїлїня были, окрем В. Ябура, ПгДр. Анна Плїшкова і адміністратівна робітнічка Аліца Турокова-Меценёва. Зачаткы были тяжкы, але помалы зачали приносити першы плоды: першых штудентів, а по штирёх роках і першых абсолвентів. Першыма абсолвентами той формы навчаня русиньского языка были Мґр. Людміла Шпрохова і Мґр. Марек Ґай (днесь екстерный докторант штудійного проґраму Славістіка - русиньскый язык і література на Пряшівскій універзітї, респ. уж на самостатнім Інштітутї русиньского языка і културы Пряшівской універзіты в Пряшові), котры ся стали першыма кваліфікованыма учітелями русиньского языка.

Днесь маме рік 2019, но все іщі мало повнокваліфікованых учітелїв русиньского языка про ІІ. ступінь основной школы і середнї школы, абсолвентів бакаларьского і маґістерьского проґраму, ку котрому в р. 2013 прибыв докторантьскый проґрам. І тот уж днесь має свого першого абсолвента. Став ся ним Мґр. Міхал Павліч, абсолвент тыж бакаларьского і маґістерьского проґраму Русиньскый язык і літеретура (в комбінації) на ПУ, якый у 2018 роцї здобыв научный тітул ПгД. і на Інштітутї русиньского языка і културы ПУ робить як одборный асістент у сферї русиньской літературы. Но треба нам іщі много кваліфікованых учітелїв, але і школярїв і штудентів русиньского языка і літературы. Але таксамо русиньскых школ, якы бы были опорныма стовпами захованя русиньского языка і розвоя народной ідентічности Русинів.

-аз-