5. 2. 2020: Конґрес буде передавати премію Pro Arte Ruthenorum. Мож подати номінації

Світовый конґрес Русинів вєдно із Русиньскым націоналным самосправованём міста Вац в Мадярьску на засїданю XV. Світового конґресу Русинів, котрый проходив у юли 2019-го року в Любовняньскых купелях, засновали Народну премію за русиньске уменя Івана Манайла під назвов Pro Arte Ruthenorum.

Тот рік ся премія буде удїлёвати по першый раз в рамках Бєнале русиньской/лемківской културы, котре буде проходити 15-го мая 2020-го року в місті Криніця в Польщі. На премію мож номіновати русиньскых умелцїв з цїлого світа.

Каждый рік єден оцїненый

Цїлём заснованя премії, як пишуть орґанізаторы, є підпорёваня і оцїнїня тых сучасных русиньскых умелцїв, котры своёв умелецьков творчостьов зробыли значный вклад до розвитку і пропаґації світового русиньского уменя.

Премія, в рамках котрой є памятна плакета, діплом і матеріална підпора умелецького діятельства, ся буде од того року удїлёвати каждый рік і буде ся нёв оцїнёвати єден вызначный русиньскый умелець на основі рїшіня журі Комісії про културу Світового конґресу Русинів.

Мож подавати номінації

На премію можуть приходити номінації з цїлого світа. У пропозіції на номінанта має быти ёго мено і коротка біоґрафія, обоснованя на номінацію і ілустратівный матеріал ёго тврочости.

Як інформовали орґанізаторы, номінації мож у 2020-ім роцї подавати до 1-го марца, і то на електронічну адресу ProArteRuthenorum@gmail.com. Журі буде о тогорічнім лавреатови премії Pro Arte Ruthenorum рїшыти на засїданю Комісії про културу Світового конґресу Русинів, котре одбуде ся 15-го марца.

Орґанізаторы хотять основанём той премії дати далшый вклад до народного возроджіня Русинів, до розвитку і популарізації по цїлім світї необычайно богатой і унікатной русиньской културы.

Іван Манайло

Іван Манайло (рр. 1942 – 2010) належыть меджі вызначных русиньскых малярів 20-го столїтя. Быв сыном Федора Манайла, якый є повязаный із прославленов русиньсков Підкарпатьсков школов малёваня. Сам закінчів Умелецько-педаґоґічну факулту Києвского умелецького інштітуту.

Дакілько років робив педаґоґа на ужгородькім умелецькім учілищу і выховав цїлу ґенерацію умелцїв, котры днесь належать меджі вызначны особности закарпатьского уменя. У 1981-ім роцї быв ініціатором і орґанізатором основаня меморіалного будинку-музею Федора Манайла. Быв єдным із основателїв і  в роках 1990 аж 1993 першый голова Соєдиненя професіоналных умелцїв Закарпатя.

У 1998-ім роцї переселив ся до Мадярьска, де жыв аж до своёй смерти. Быв актівный в тамтешнім русиньскім русї, дале вів актівну творче і выставкове діятельство.

Іван Манайло експеріментовав у різных штілах – од кубізму до реалізму. Мав великы успіхы і в рамках ґрафічных робот. Ёго творы находять ся в музеях і пріватных колекціях на Українї, в Мадярьску, Чеській републіцї, на Словакії, в Ґрузії, Росії, Хорватії, Австрії ці в Нїмецьку.

Петро МЕДВІДЬ, ЛЕМ.фм