5. 11. 2017: Мурянка і Дуць-Файфер на Варшавскым Університеті

В днях 13.-18. листопада/новембра 2017 р. на Варшавскым Університеті буде проходил Тыжден Языковой Ріжнородности. То подія, яку орґанізує выділ Artes Liberales. Серию цілотыжньовых акций отворит стріча з лемківскым языком, якій запрезентуваний буде Петром Мурянком. Лемківскій буде мож і почути четвертого дня подіі, товды то свою поезию прочытат др габ. Олена Дуць-Файфер. В проґрамі тіж наукова конференция, на котрій єдна з доповіди буде по лемківскы. 

Тыжден Языковой Ріжнородности має за ціль звернути увагу на тото, што важну культуротворну роль одгрывают меншыновы языкы. Орґанізаторы хочут вказати хосен выплываючий з вельоязычности соспільства. Тырваючы цілий тыжден акциі то такой можніст промоциі діянь, якы сут ведены выділом Artes Liberales та спілпрацуючыма з ним дослідниками.

Поезия Петра Мурянкы

 

В перший ден Тыжня Языковой Ріжнородности, т.є. 13. листопада/новембра т.р., од 11.00 год. в просторах Університетской Бібліотекы в Варшаві проходил буде вернісаж выставы фотоґрафій пн. Языкова ріжнородніст – культурове богатство світа, вчас якого з міні-речітальом выступит Петро Мурянка. Артиста не лем запрезентує своі творы, але і розповіст про русиньску культуру та язык. Саму выставу мож видіти до 26. листопада/новембра т.р.

 

Олена Дуць-Файфер в першій роли

 

Другій раз з русиньскым языком буде ся мож стрітити в четвер, 16. листопада/новембра т.р. Товды то одкрыта буде выстава пн. Ріжнородніст языкова в світі та своі вершы прочытат др габ. Олены Дуць-Файфер. Акция пройде о 17.00 год. в Казімєжовскым Палаци в Варшаві. Выстава буде доступна до 30. листопада/новембра.

 

Лемківскій голос на медженародній конференциі

 

Др габ. Дуць-Файфер не лем буде мала авторску стрічу, але і выступит на науковій конференциі, яка буде проходила 15.-16. листопада/новембра. Єй доповід заплянувана є на четвер, 16. листопада/новембра, вчас головного панелю о 10.30 год. Тема, з яком выступит академічка, то Стратити язык – што то значыт, што то творит. Лемківскє выгнаня з языка. Як про нашу редакцию повіла прелеґентка, єй доповід вызвучыт в русиньскым языку. 

Лемківскій язык видний буде і в підписах фотоґрафій вказуваных на выставах. Рыхтувана є тіж велика інформацийна плянша про русиньскій язык. 

Богатий проґрам подіі можете чытати за тым мотузком. Каждого дня в рамках Тыжня Языковой Ріжнородности проходити будут выступліня, доповіди, концерты та варшаты, што мают на ціли промоцию загыбаючых языків.

 

Севериян КОСОВСКЫЙ