5. 10. 2023: У новим „Руским слове”

НОВИ САД – У штерацетим чишлє новинох „Руске слово” на бокох рубрики Тижньовнїк пише о активносцох Вивершного и Одбору за образованє Националного совиту Руснацох, а ту и звит зоз першей схадзки Орґанизацийного одбору преслави Националного швета Руснацох 2024. року у Дюрдьове.

Нашо места зазначели як означени Дзень мобилносци у Керестуре, Дзецински фолклорни стретнуца у Дюрдьове, а ту и напис зоз медзинародней културней манифестациї „Кед голубица лєцела” у Петровцох, док на Економиї пише о тогорочним урожаю єшеньских польопривредних културох.

На бокох рубрики Духовни живот пише як Петровчанє преславели Кирбай и як виронаучни дзеци зоз Вербасу нащивели Водицу, а пише и о початку роботи Духовного центру „Йосафата”.

О тим як означени Европски дзень язикох, о отриманим Округлим столє о Костельниковей Граматики и законченє фельтону о 270 рокох образованя на руским язику мож пречитац у рубрики Култура и просвита.

У тим чишлє новинох у рубрики Людзе, роки, живот представена Настася Надь з Руского Керестура и Вера Павлович, професорка и новинарка зоз Горватскей.

Спорт пише о тим як преславени 100 роки иснованя Фодбалского клубу „Русин”, а ту и резултати наших клубох у своїх першенствених лиґох.

Як додатки у тим чишлє вишли Мозаїк и Дикица, а ту и порядна рубрика на концу новинох Горуци тепши.

Я. ДЮРАНЇН, Рутенпрес

(Публікуєме в оріґіналї – войводиньскім варіантї русиньского языка.)