4. 9. 2024: Карпаторусиньске общество одсвяткує 30 років од основаня

Як інформовало на своїм офіціалнім сайтї Карпаторусиньске общество (Carpato-Rusyn Society), котре дїє в Споєных штатах Америкы, орґанізація собі в днях 25-го аж 27-го октобра 2024-го року припомяне 30 років од свого основаня.

Вікендовый проґрам святковань про членів і сімпатізантів буде проходити в Народнім карпаторусиньскім културнім і освітнїм центрї (Carpatho-Rusyn Cultural and Educational Center) в Мунгаллі, в Пенсілванії. До святковань є залученый і Карпаторусиньскый научный центер в США (Carpatho-Rusyn Research Center) а Фундація Джона і Гелены Тімо (John and Helen Timo Foundation).

Почас святковань буде приступна од пятніцї выстава творів карпаторусиньского художника Антоні Кубека, о котрім буде мати в пятніцю лекцію асоц. проф. Др. Ніколас Купеньскый із Академії авіачных сил США під назвов Перед Варголом: Жывот і творчость Антоні Кубека.

Про участників події буде пририхтованый автобус, на котрім почас суботы можуть іти посмотрити хыжу Варголовых в Піттсбурґу, Ґрекокатолицькый храм святого Йоана Крестителя в Піттсбурґу ці Православный храм святого Михаіла в Ранкінї. Субота закінчіть ся юбілейным банкетом.

В неділю одбуде ся 42-ый рочник Карпаторусиньскых святковань, котры будуть проходити в Ґрекокатолицькім храмі святого Йоана Крестителя в Юніонтавнї.

Карпаторусиньске общество выникло в 1994-ім роцї і ёго цїлём є утримованя і сохранїня своёй русиньской културы, історії, языка і наслїдства русиньскых предків. Зато общество приготовлює многы културны події, але і зберать історічны, ґенеалоґічны, языковы і етно-културны інформації о карпатьскых Русинах.

Колись в друкованій верзії, днесь вже лем електронічно, общество выдає од початку свого існованя анґлоязычну ґазету The New Rusyn Times.

Основане было общество в Піттсбурґу, но свої філії має і в далшых містах і штатах як Клівленд, Даллас, Ню Джерсі ці Ню Йорк.

Петро МЕДВІДЬ, ЛЕМ.фм, языкова і ґрафічна управа: АРК в СР.