4. 9. 2019: Черезгранична стріча на лавці Жеґєстів – Сулин

1. вересня/септембра 2019 р. на лавці, котра лучыт два русиньскы села – Жеґєстів і Сулин, проходила «Черезгранична польско-словацка стріча».

Стрічы тоты орґанізуваны сут уж од 4 років – значыт од часу, коли побудувано міст медже тыма русиньскыма місцевостями. Тогорічна подія зачала ся од привитаня жытелів обох держав старостком Сулина, Анном Гіляковом. Пак сулиньскій грекокатолицкій парох, отец Павел Сиротняк, привитал ся з римокатолицкым священником з Жеґєстова і разом помолено ся перед образом Божой Матери в обох языках. Дальше, по словацкій страні мосту, од вводного слова старосткы Сулина і війта ґміны Жеґєстів зачал ся культурный проґрам. Выступило вельо русиньскых ґруп, не бракло і словацкой та польской музикы. Жыючы в Польщы мали можливіст хоц кус познати русиньскій та словацкій фольклор, а жытелі Словациі ліпше познати польску культуру. Лавка Жеґєстів-Сулин звана є Лавком Спілпрацы і Розвитку Погранича.

Стрічы мают на ціли єднати люди а тіж і дают можливіст ліпше познати культуру сусідньой державы, котра находит ся по другій страні рікы Попрад.

Наталія КЛИНКОВСКА, ЛЕМ.фм

(Публікуєме в оріґіналї – лемківскім варіантї русиньского языка.)

Script logo