4. 8. 2021: Чірч хоче будовати кемп

Фундушы од державы хоче село здобыти безплатно.

Село Чірч, Старолюбовняньского окресу, має далшы планы на свій розвиток. Як інформовала аґентура SITA, село бы хотіло на своїй теріторії выбудовати кемп.

Пропозіція рахує з теріторійов 5 тісяч квадратных метрів, причім ся очекує інвестіція 150 тісяч евр. Як повів староста Михал Дідик, затля ся робить на штудії. Но село буде мусити наперед дати до порядку фундушы.

Векшына фундушів державных

Кемп бы мав быти коло головной драгы. Є планованый про бываня в шатрах, караваны, з тым, же ку діспозіції будуть і соціалны заряджіня. До будучности ся рахує з тым, же кемпінґ бы ся доповнив о хаткы, котры бы ся дали арендовати.

Подля Дідика село поступно зачінать давати до порядку фундушы. „Векша часть є державна, зато сьме вже пожадали державу, жебы нам їх даякым способом дала, безплатно, в рамках того, же то є в публічнім інтересі,“ пояснив староста про аґентуру.

Дідик думать, же в припаді успішного процесу з фундушами бы ся проєкт міг зачати реалізовати до пятьох років. Самосправа затля роздумує о жрідлах фінанцованя, чекать на ґрантову вызву, котра бы на то пасовала.

На будованю кемпу буде брати участь і сельскый соціалный подник Солиско Чірч. Фірма має за собов выбудованя матерьской школы, комунітного центра ці квартелів.

Турістічный потенціал

Подля старосты має тамтеншній реґіон і околіця Чірча великый потенціал, головно што до турістікы. Близко є граніця з Польщов і до 6-ох кілометрів суть на польскім боці турістічны міста Мушына і Криниця.

Село хоче подля Дідика дашто, што має потенціал і тот проєкт за його думками го має доста великый на то, жебы притягли людей нелем зо Словакії, але і Польщі.

Петро МЕДВІДЬ, ЛЕМ.фм,  ґрафічна і языкова управа: ред. АРК в СР.