4. 8. 2021: Iконы зза кляузуры

В Музею Аббатства в Тынци тырват выстава «Артиста пророк. Іконы Юрия Новосільского». То нагода, жебы видіти рідко вказуваны творы артисты.

Експозиция проходит з нагоды 10. річниці смерти артисты. «Хотіли сме вказати сакральну творчіст Новосільского репрезентувану через роботы, якы походят з костелів і монастырів з Кракова і околиц. Векшіст презентуваных творів є наштоден недоступна для публикы, бо находит ся за монастырском кляузуром і обзерати іх можут лем монахы» – пояснят Марта Штвєртня, кураторка выставы.

З Тынця походят два кресты, а тіж два Мандиліоны. Місцеве Аббатство Бенедиктинів є найстаршым істнуючым монастырьом в Польщы – уфундувал го найпевнійше Казимир І Одновитель в 1044 р. Кус пізнійше на вапенным Монастырскым Верху над Віслом вознесли ансамбль романьскых будівель.

Крест, табернакль, іконы

Примонастырскій Музей Бенедиктинів находит ся в підземлях і на партері будинку бывшой бібліотекы. В невеликій сали, ґотицкій характер котрой є захованый, презентуваных є 13 творів Юрия Новосільского з ріжных періодів творчости, векшіст з 60. років минулого столітя.

В центрі выставы поміщеный є великій піллежачый олтарный крест в Монастыря Сестер Облаток Серця Ісуса в Кракові. Одтамале тіж приіхал табернакль, котрый запроєктувал і зробил вєдно з малюнками Новосільскій. Видіти мож дале м.ін. «Св. Осифа зо сценами з жытя» і «Собір Успінія Богородиці» з грекокатолицкой церкви покровы Воздвижыня Святого Креста в Кракові. Публика може пообзерати тіж ескізник артисты з 50. років ХХ ст.

«Ерудицийне знаня Новосільского з обшыри теолоґіі, як і філософіі позвалало му на барз свідоме творіня творів осадженых в традициі, але не будучых копіями давных взорів» – пише в анотациі до выставы кураторка.

Презентуваным іконам товаришат цитуваня взяты з выповіди артисты, м.ін. «В своє свідоме малярство вошол єм двоіма дверми: єдны то была свідоміст модерного малярства, другы – свідоміст іконы, філософіі і теолоґіі іконы».

Вродженый в Кракові Юрий Новосільскій (1923-2011) был культуровым спадкоємцьом по мамі – Польці австрийского походжыня, римокатолицкого віроісповіданя, і по вітцю – грекокатолицкым Лемку. Векшіст жытя провюл в Кракові. На початку 40. років пару місяців жыл в православній Лаврі св. Йоана Крестителя під Львовом. Творы Новосільского находят ся в православных, грекокатолицкых і римокатолицкых храмах. Його штука выкликувала захопліня і контроверсиі. Реализациі бывали одмітуваны через вірных як незрозумілы, за барз модерны.

Выставу мож видіти до марця 2022 р.

Наталія МАЛЕЦКА-НОВАК, ЛЕМ.фм фот. Томаш Вєчорек

Script logo