4. 7. 2017: Народностны меншыны выберали своїх представителїв

В понеділёк 3-го юлія 2017-го року проходили в Пресцентрї Уряду влады Словацькой републікы вольбы до Выбору про народностны меншыны і етнічны ґрупы, кідьже закінчів ся трирічный функчный період, котрый дотуляв ся векшыны членів выбору про народностны меншыны і їх заступцїв. На цїлы вольбы дозерала комісія із семох членів, рахованя голосів было за участи нотаря.

 

Орґанізації народностных меншын ся могли писемно зареґістровати і приголосити волителїв на волебну громаду, як і пропоновати кандідатів на членів выбору і кандідатів на заступцїв членів у выборї в згодї із Вызвов на реґістрацію кандідачных списків і вызвов на реґістрацію народностных орґанізацій доказательно анґажуючіх ся в области підоры, всокочіня і розвитку ідентічности і културы членів народностны меншын до 23-го юнія 2017-го року.

 

Русиньска народностна меншына має в меншыновім выборї двох рядных членів з єдным голосом при голосованю і двох заступцїв, котры можуть прийти на засїданя намісто рядного члена, котрый не годен взяти участь. В попереднім періодї членами Выбору про народностны меншыны і етнічны ґрупы за русиньску народностну меншыну были Ян Липиньскый і Мілан Піліп, котрый быв рядным членом аж од децембра 2015-го року, по абдікації Мілана Мнягончака з функції. Заступцями были Петро Медвідь і Владимір Мінчіч. Мінчіч быв заступцём так само аж од децембра 2015-го року, коли в позіції заступцю вычеряв Мілана Піліпа, якый наступив за рядного члена.

 

О право голосовати приголосило ся за русиньску народностну меншыну 16 орґанізацій. За рядных членів были пропонованы Мілан Піліп, Петро Медвідь, Мартін Караш і Люба Кралёва. За заступцїв приголошены орґанізації пропоновали Яна Липиньского, Мілоша Стрончека і Марію Ґоцову.

Уряд влады вечур по понедільковім голосованю опубліковав резултаты і мена нововзволеных членів і заступцїв про окремы народностны меншыны, узнаны на Словакії, з вынятком україньской меншыны, кідьже у той меншыны не были платны голосы і так буде мусити голосовати ся в рамках Українцїв іщі раз.

Новозволеныма преставителями Русинів Словакії, котры здобыли найвеце голосів, на слїдуючій період трёх років у Выборї про народностны меншыны і етнічны ґрупы суть Мілан Піліп і Петро Медвідь, як рядны членове і їх заступцями будуть Ян Липиньскый і Мілош Стрончек.

 

Выбор про народностны меншыны і етнічны ґрупы є сталым одборным орґаном Рады влады Словацькой републікы про людьскы права, народностны меншыны і родовну рівность про вопросы дотуляючі ся народностных меншын і етнічных ґруп і їх членів і про область імплементації Европской харты реґіоналных або меншыновых языків в смыслї Рамкового договору на охорону народностных меншын. Повнить функцію конзултатівного орґану у справах участи членів народностных меншын і етнічных ґруп на рїшіню справ дотуляючіх ся народностных меншын і етнічных ґруп.

 

Зволеных кандідатів за окремы меншыны офіціално выменує за членів і заступцїв членів Выбору про народностны меншыны і етнічны ґрупы уповномоченый влады Словацькой републікы про народностны меншыны і етнічны ґрупы і єдночасно председа споминаного выбору Ласло Буковскый на вынятковім засїданю выбру в новім складї, котре є наплановане на 18-го юлія 2017-го року.

 

П. M.