4. 6. 2024: Одбыла ся 26-та стрїча русиньскых школ

В суботу, 1-го юна 2024-го року, одбыла ся  26-та стрїча русиньскых школ, котра тот рік проходила в Хорватії. Стрїчу орґанізовали Основна школа Антуна Бауера у Вуковарї і Подручна школа у Петровцях (малокласна підпорядкована школї у Вуковарї, позн. ред.). Інформує о тім аґентура Рутенпрес.

В Петровцях при тій нагодї одсвятковала ся 110-та рочніця будинку школы і 30-та рочніця од першой стрїчі русиньскых школ у сполупраці з Дружством про русиньскый язык, літературу і културу в Новім Садї, при підтримцї Оддїлїня про освіту Націоналного совіту Русинів Сербії.

На стрїчі брали участь школы із Руського Керестура, Коцура, Дюрдёва, Нового Саду, општины Шід, Кулы, Нового Орахова і Савиного Села, котрых привітав директор Основной школы Антуна Бауера Златко Міліч. Школярї із школы в Петровцях пририхтовали участным інтересный проґрам.

На стрїчі были участны і представителька Дружства про русиньскый язык, літературу і културту Іріна Папуґа, Олена Папуґа за Оддїлїня про освіту Націоналного совіту Русинів, як і учітелькы із спомянутых школ.

Іріна Папуґа школї в Петровцях од Дружства про русиньскый язык, літературу і културу передала дарунок до школьской бібліотекы, книжкы, котры выдало Дружство. Подія в Петровцях продовжовала навщівов Ґрекокатолицькой церькви Покровы Пресвятой Богородіцї, а пак участны ішли посмотрити Етноґрафічну експозіцію Русинів Хорватії.

Проґрам стрїчі пак продовжовав навщівов Основной школы Антуна Бауера у Вуковарї, де школярї так само приготовили інтересный проґрам. Тогорочна стрїча была закінчена навщівов Ґрекокатолицькой церькви Хріста Царя у Вуковарї, в котрій участны выслухали і інтересности о тій парохії, яка была основана у 1962-ім роцї.

Петро МЕДВІДЬ, ЛЕМ.фм, языкова і ґрафічна управа: АРК в СР