4. 6. 2020: Од півночі обновив ся вольный рух меджі СР і ЧР без обмеджінь

Од півночі зо середы на четверь (4. 6. 2020) ся обновив необмедженый режім на граніцях меджі Словацьков републіков і Чеськов републіков. Премєры обох країн Іґор Маторіч і Андрій Бабіш (справа) то підтвердили перед зачатём їх засїданя в рамках середняйшой (3. 6. 2020) загранічной робочой навщівы председы СР Матовіча в Празї.

„Од півночі зо середны на четверь (4. 6. 2020) заводжуєме вольный рух меджі Словакіёв і Чеськов републіков,‟ повів шеф словацого кабінету. Договор о тім кроцї подля нёго быв на світї уж перед двома днями.

„Од півночі будеме мочі слободно путовати меджі Словакіёв і Чеськом, так як то было перед взником пандемії нового коронавірусу,‟ підтвердив Бабіш.
В сучасности (3. 6. 2020) можуть жытелї Чеська і Словакії путовати без пітверджіня о неґатівнім тестї на КОВІД-19, кедь перебываня не перевышыло 48 годин.
Подробности одкрытого режіму мають премєры ознамити по сполочнім засїданю, на котрім мають говорити о пандемічній сітуації в обох країнах, так само мають діскутовати о білатералній сполупраці і пропозіції довгодобого розрахунку Европской унії.

Словацького премєра прийме в рамках проґраму і презідент ЧС Мілош Земан, так істо, як і шефове обох комор чеського парламенту – председа Сенату Мілош Выстрчіл і председа Посланецькой снёмовнї Радек Вондрачек.


Здрой: Медіялный сервіс Уряду влады СР, переклад зо словацького языка: А. З.

Script logo