4. 2. 2021: Безробітность в ПСК вдяка пандемії наросла. Высоку мають русиньскы окресы

Зачатком 2020-го року належав до катеґорії окресів з процентом евідованой безробітности высшым як 13 в рамках Пряшівского самосправного краю (ПСК) лем окрес Кежмарок. В децембрї там уж належали і окресы Сабінів, Воронів над Топлёв, Свідник, Меджілабірцї і Бардеёв. Інформації подав ПСК.

В марці 2020-го року пандемія коронавірусу запричінила скоре роснутя безробітности по цїлій Словакії. Меджі першым і остатнїм місяцём минувшого року дішло ку нароснутю евідованой безробітности скоро о 40 процент.

Од юла до октобра безробітность в Пряшівскім краю мірно знижовала ся, но в остатнїх двох місяцях знова звекшовала ся великов скоростёв. ПСК має єднако як перед пандеміёв найвысшу безробітность в рамках Словакії, ку кінцю року на уровни 11,4 процента. Найгірше є на тім окрес Кежмарок ізн скоро 18-процентнов безробітностёв, найлїпше окрес Попрад, де евідують 7,1 процент безробітных.

В децембрї досягла безробітность веце як 13 процент аж в шестёх окресах ПСК. Суть то окресы Кежмарок, Сабінів, Воронів над Топлёв, Меджілабірцї і Бардеёв. Смутный рекорд має Сабінівскый окрес, де меджі януаром аж децембром наросла безробітность із 9,83 на 16,01 процента.

Кедь ся посмотриме на окресы, де жыє векше русиньске населїня, пак є на тім моментално найгірше Свідник, котрый має безробітность на уровни 13,8 прпоцент. Меджілабірцї мають 13,6 процент, слїдує окрес Бардеёв із 13,4 процентами. В окресї Стропків евідують 12,1, процент. Снина має 11-процентну безробітность. Окрес Стара Любовня має 9, Гуменне 8,4 процент безробітных.

Петро МЕДВІДЬ, ЛЕМ.фм, языкова управа: ред. АРК в СР

Script logo