4. 12.2024: Фірцак продовжує в румуньскім парламентї як посланець за Русинів

1-го децембра 2024-го року проходили в Румунії парламентны вольбы. Обчане выберали собі новых представителїв Сенату і Посланецькой сеймовнї – двох палат Парламенту Румунії.

Окрем 31 політічных партій і аліанцій, котры змагали ся о кресла в парламенті, на вольбах брало участь і 19 орґанізацій, котры представлюють народностны меншыны, якы жыють в Румунії, і суть офіціално узнаны. Народностны меншыны мають своїх представителїв якраз в Посланецькій сеймовнї.

Аж 18 народностных орґанізацій притім в сеймовнї могло здобити од єдного до сім мандатів.

За русиньску народностну меншыну у вольбах подало кандідачный список Културне товариство Русинів Румунії, яке є і членом Світового конґресу Русинів. За орґанізацію кандідовав Юліус Маріян Фірцак, котрый быв русиньскым посланцём і в двох попереднїх періодах, далше на списку были Франціск-Оскар Ґал, Маріяна Светлана Мурешан, Кармен Светлана Бойчук, Ґабріела Хрістіна Боднарюк і Марія Бочікор.

Мандат члена парламенту за русиньску меншыну обгаїв Юліус Маріан Фірцак. „Дякуєме сердечно за довіру і підпору, яку дали сьте Културному товариству Русинів Румунії,“ написав Фірцак на сітї Facebook.

Здрой: Петро МЕДВІДЬ, ЛЕМ.фм, языкова і ґрафічна управа, скороченя: АРК в СР.