4. 12. 2017: Засїдав Округлый стіл Русинів Словеньска

В суботу 2-го децембра 2017-го року проходило вже 24-те засїданя Округлого стола Русинів Словеньска. Засїданя одбыло ся в просторах Словацького народного музею – Музею русиньской културы.

Платформа діскутовала о пріорітах і алокації фінанчных средств із Фонду на підпору културы народностных меншын на рік 2018 і єдночасно приготовила мануал про старостів сел, котрый має помочі при приправі і реалізації културных актівностей. ОСРС в суботу говорив і о іщі все проходячім юбілейнім Роцї Адолфа Добряньского, ці о припомянутю собі 100-ой річніцї выникнутя сполочной державы Чехів, Словаків і Русинів – 1-ой Чехословацькой републікы.

Пріоріты в проєктах і мануал про старостів

 

Єдным із основных пунктів суботнёго засїданя была діскузія о пріорітах і алокації фінанчных средств. Петро Штефаняк, котрый є того часу директором Радіа русин ФМ і єдночасно ведучім Фолклорного ансамблю Рутенія, приготовив і одпрезентовав модел на перерозділїня фінанцій із Фонду на підпору културы народностных меншын на рік 2018. Штефаняком презентованый модел быв першов верзіов, котра по діскузії на суботнїм засїданю буде доповнёвати ся і управлёвати. У своїм моделї акцентовав, жебы проєкты, котры ся будуть підтримовати, служыли главно на заставлїня вытрачаня ся русиньского языка ці піднятя чісла людей, котры ся ку Русинам будуть голосити. Споминаны цїлї бы мали быти забезпечены так, же при проєктах буде ся смотрити на русиньскы пріоріты, котрыма будуть розвиток школства, розвиток медій, културны події із акцентом на русиньске усвідомлїня ці робота з молодежов.

На задїсаню веце членів выразило ся ку моделу, котрый быв выпрацованый Петром Штефаняком і ОСРС ся доїднав, же позначкы членів будуть автором моделу закомпонованы до офіціалной верзії, котру буде ОСРС просаджовати.

Платформа так само, як было обіцяне председом ОСРС Яном Липиньскым, в суботу одпрезентовала мануал під назвов „Приготовлїня і реалізація културных актівностей про старостів русиньскых сел“. Мануал, котрый має помочі старостам, быв написаный Светалнов Хомов і быв загнаный вшыткым старостам русиньскы сел як методічна поміч.

Юбілей кінчіть і зачінать

 

ОСРС оцїнив на своїм засїданю дотеперь зроблены події в рамках Року Адолфа Добряньского, котрый быв тов платформов выголошеный із нагоды 200-ой річніцї народжіня вызначного русиньского політіка і реформатора. Єдночасно были членове інформованы, же в Пряшові буде в день ёго народжіня, 18-го децембра 2017-го року, одкрыта памятна табла, котра бы ся мала находити в Руськім домі на Главній уліцї.

Вже теперь Русины рихтують ся на далшый юбілейный рік, кідже в роцї 2018 будеме припоминати собі 100 років од заснованя 1-ой Чехословацькой републікы, сполочной державы Чехів, Словаків і Русинів. У рамках того была выбрана робоча ґрупа, котра буде коордіновати і ініціовати актівности повязаны із тым юбілеом. До робочой ґрупы были менованы Ольґа Ґлосікова, директорка Словацького народного музею – Музею русиньской културы в Пряшові, Ян Липиньскый, Петро Медвідь, Петро Штефаняк і Петро Кімак-Фейко.

Діскузія о методіцї про перепис жытелїв

 

Петро Медвідь як член Выбору про народностны меншыны і етнічны ґрупы за русиньску народностну меншыну на Словакії інформовав на кінцю засїданя участных о тім, же Словакія робить на новій методіцї, подля котрой ся буде робити перепис жытельства в роцї 2021. Подля першых інформацій бы нова методіка мала мати і можливость писати собі дві народности.Тото представителі Русинів беруть за крок, о котрім треба выкликати шыроку одборнуфахову діскузію в рамках представителїв меншын, кідьже зо собов може приносити і неґатівны наслїдкы. Зато представителї Русинів у народностнім выборї будуть таку діскузію ініціовати з тым, же заженуть компетентным орґанам позіцію русиньской народностной меншыны односно той темы.

 

П. М.