4. 11. 2021: Вмер отець Мілан Ґерка

Належав меджі найвызначнїшы особности Православной церькви в чеськых країнах і на Словакії.

У віцї 76 років вмер у віторок, 2-го новембра 2021-го року, в Пряшові православный священик, отець Мілан Ґерка. Быв секретарём і говорцём Святїшого сіноду Православной церькви в чеськых країнах і на Словакії.

В минулости быв і деканом Православной богословской факулты в Пряшові. Ґерка быв і членом Метрополітной рады Православной церькви на Словакії а ректором Православной духовной семінарії Православной богословской факулты Пряшівской універзіты в Пряшові.

Актівный на духовній ниві

Мітр. прот. проф. Мілан Ґерка, к. н., народив ся 6-го януара 1945-го року в Ортутовій, русиньскім селї Бардеёвского окресу. Абсолвентом православной теолоґії став у 1965-ім роцї. На Православній богословскій факултї втогдышнёй Універзіты Павла Йозефа Шафарика в Пряшові зачав дїяти по здобытю кандідатуры на Петербурґскій духовній академії.

Од 1983-го року быв професором православной теолоґії. Занимав ся ексеґезов Старого завіта і єврейскым языком. В роках 1987 аж 1993 быв деканом факулты.

Актівным быв і як душпастырь. Быв кантором в Катедралнім соборї св. князя Александра Нєвского в Пряшові, економом Уряду єпархіалной рады Православной церькви в Пряшові, духовным справцём Православной церьковной общіны в Завадцї (на Спішу), орґанізовав і Православну церьковну общіну в Спішскій Новій Всі. Основав і церьковны общіны на западній Словакії, главно про духовны потребы реоптантів, котры ся там переселили з Україны.

Быв так само канцеларём Уряду метрополітной рады Православной церькви на Словакії, і од 1998-го року аж до своёй смерти быв деканом про окресы Спішска Нова Вес, Ґелніця і Левоча. В роцї 1998 основав Філантропію Православной церькви на Словакії, пак став їй директором. Од 2001-го року быв секретарём і говорцём Святїшого сіноду Православной церькви в чеськых країнах і на Словакії.

Ходив меджі Русинів

Отця Мілана Ґерку добрї знали Русины. Много раз чути го мож было в рамках духовных приговорів, котры мав про русиньске высыланя Словацького радія, ходив і на русиньскы културно-общественны події.

Часто в минулости помагав і при орґанізованю подій в Словацькім народнім музею – Музею русиньской културы в Пряшові, главно кедь ся робили културны проґрамы повязаны з выставков перед такыма праздниками як Великдень і Рождество.

Вдяка отцёви Міланови Ґеркови, ёго намагам, помочі, выникла у просторах русиньского музея у 2020-ім роцї експозіція під назвов Утверди, Боже – з історії Православной церькви на Словакії до року 1948. 

Вічная ёму память!

Петро МЕДВІДЬ, Лем.фм. Ґрафічна і языкова управа: ред. АРК в СР.