31. 5. 2021: Проґрам Театру Александра Духновіча в Пряшові на місяць юн 2021

Приносиме вам проґрам Театру Александра Духновіча в Пряшові на місяць юн 2021-го року.

4-го юна 2021

Ани мак (Велика сцена, 19.00 год., 1-ша премєра)

Зуна, іншпірована геройков із роману Франтїшка Швантнера під назвов Невіста голь, воює із стереотіпами одношіня чоловіка 21-го столїтя ку природї. Як змінили ся односины чоловіка і природы, і як овпливнила ґлобалізація наше (нелем) енвіроманталне оточіня? Вкаже му путь вонка із цїлый час прискорюючого ся і неутримательного колобігу? Лиця нам освітлює світло екрану і природа нам чезне перед очами. Забываме на то, же якраз она є нашов частёв. Ці конзум є правилна путь? Є профіт основнїшый як охрана нашой природы? Жывота? Мате обще час… жыти ту?

9-го юна 2021

Ани мак (Велика сцена, 19.00 год., 2-га премєра)

16-го юна 2021

Зістали за дураків (Велика сцена, 19.00 год.)

Україньскый комедіоґраф Марко Лукич Кропивницькый представлює ся в Театрї Александра Духновіча далшов комедіёв. 12 дївок на оддаваня, но жаден жених, холем не на першый погляд. Богатый млинарь Кукса і ёго сусїд, коваль Дранко, суть безнадїйны в гляданю богатого мужа про своє велике потомство, но не знають, же жены ся о себе знають постарати самы, і поміч од отцїв їм нияк не треба.

23-го юна 2021

Мірандоліна (Велика сцена, 19.00 год.)

Облюблена комедія того автора є шармантнов, даколи чарівно неоґабанов, другыраз болячо остров, раз меланхолічно резіґнованов, раз бурливо забавнов пєсов. Карло Ґолдоні має намагу з легкостёв і гумором вказовати на меджілюдьскы односины і своїм майстровством выкреслює інтересны жывотны сітуації. (Пєса є в україньскім языку.)

30-го юна 2021

Ани мак (Велика сцена, 19.00 год.)

Петро МЕДВІДЬ, ЛЕМ.фм, ґрафічна і языкова управа: ред. АРК в СР.