31. 5. 2018: „Лемколaндiя‟ – День дїтины по лемківскы

В найблизшу суботу, 2. червця/юнія 2018 р. о 11.00 год., на подвірци Ліґницкого Центру Культуры пройде лемківскій Ден дітины – «Лемколяндия». То подія орґанізувана ЛАПіТ «Кычера». В єй рамках орґанізуваных буде вельо атракций для наймолодшых.

Буде то перша того рода ініциятива ансамблю «Кычера». По правді, ґаздами і орґанізаторами будут діти з колективу «Кычерка». То они просят своіх ровесників до спільной забавы, де не бракне цінной наукы лемківского языка і культуры.

«Лемколяндия» то така наша пропозиция в Ліґниці для діти на Ден дітины. Хцеме вказати кусцьок нашой культуры (…), зачнеме од того, што робиме з «Кычером». Будеме вести занятя з лемківского танця, буде мож ся навчыти гры на пастырскій тромбиті, бо повело ся найти в джерелах, же в ХІХ ст. нашы предкы грали на тромбитах, повіл для порталю lem.fm Юрий Стариньскій, орґанізатор подіі.

В рамках цілодньовой подіі пройдут так само плястичны занятя. Цінне про наймолодшых буде чытаня лемківскых байок і так само вчыня лемківской азбукы. Байкы буде чытала м.ін. Юлия Дошна, запросили сме до спілпрацы тіж п. Укача Возняка, буде і лекция лемківской каліґрафіі (…), продолжал ведучий «Кычеры».  До спілпрацы запрошена є плятформа «Лемколянд», презентуюча мультімедияльны гры і байкы для діти. Плянувана є стріча з Жульєтом Ґонзалез-Спрінґер, Мексиканком, авторком ілюстраций до книжкы з лемківскыма байками і оповіданками пн. «Як Липняне сонце до міха імали».

Єдном з головных ціли Дня дітины є публична презентация місту Ліґниця лемківского языка, культуры і нацийональной спадковины, котра в примірі наймолодшых сохранила ся в формі байок, оповідань і забав.

По 18.00 год. в Рыцарскій Академіі одбуде ся концерт ЛАПіТ «Кычера».

Севериян КОСОВСКЫЙ

(Публікуєме в оріґіналї – лемківскім варіантї русиньского языка, окрем главной назвы.)

Script logo