31. 5. 2016: В Братїславі засїдали представителї народностных меншын

Як інфомовав Округлый стіл Русинів Словеньска ёго председа Мілан Піліп, 30-го мая 2016-го року в Братїславі засїдав Выбор про народностны меншыны і етнічны ґрупы Рады влады Словацькой републікы. Выбор першыраз засїдав з новым уповномоченым про народностны меншыны і етнічны ґрупы Ласлом Буковскым. За русиньску народностну меншыну у выборї суть Мілан Піліп і Ян Липиньскый.

Выбор знова проїднав вже схваленый Акчный план, котрый бы мав забеспечіти реалізацію Цїлодержавной охороны і підпоры людьскых прав у Словацькій републіцї. Тот план, в котрім є залучена і аналіза леґіслатівы, яка односить ся ку народностным меншынам (Словацька републіка не має доднесь народностный закон), є затля лем на папірю. Выбор підпорив Ласла Буковского у просаджованю далшой реалізації того плану. Так само была на засїданю схвалена Інформація о позіції і правах членів народностных меншын за рік 2015.

На засїданю быв участный і штатный таёмник Міністерства школства, наукы, баданя і шпорту Словацькой републікы Петро Крайняк. Крайняк выбор інформовав о змінї школьского закона, котра є напрямлена до того, жебы ся забранило занику малокласных школ од школьского рока 2016/2017. Тым ся забранить і заникнутю веце як  20 школ, в котрых є навчалный язык мадярьскый і русиньскый. Малокласны школы будуть годны фунґовати і дале, аж до векшой новелізації школьского закона, котра ся приготовлює.

Мілан Піліп членів выбору на засїданю інформовав і о заключінях із конференції, котра была орґанізована Словацькым народным музеём – Музеём україньской културы у Свіднику в днях 8-го аж 9-го апріля 2016-го року під назвов Українцї в історії і културї Карпат. О тых заключінях найперше інформовав наш портал в статї Свята інквізіція.

Кідьже іде о контроверзный документ, котрый має намагу пояснити, же Русины не існують і їх язык є лем діалектом, навеце іде о документ, котрый быв выданый в рамках конференції, котрой головным орґанізатором была державна інштітуція, Округлый стіл Русинів Словеньска дав собі выготовити судный переклад того документу, із котрого обсягом были членове выбору і уповномоченый про народностны меншыны і етнічный ґрупы познакомлены на споминанім засїданю.

Представителька Міністерства културы Словацькой републікы, котра была участна на засїданю, конштатовала, же іде о важну справу і пропоновала, жебы ку даній проблематіцї было зорґанізована стрїча на їх міністерстві, жебы пояснити тоту сітуацію. О участь на стрїчі проявив інтерес і уповномоченый Ласло Буковскі, котрый хоче, жебы ёго уряд мав на тій стрїчі своє заступлїня.

П. M.