31. 3. 2020: Правила прийняты на Словакії про коронавірус являть ся як ефектівны

Братїслава 31. марца (TASR)  Правила, котры были прияты про заставлїня шырїня хвороты COVID-19, ся являть як ефектівны. Кедь їх буде Словакія знати довше дотримовати, могла бы ся дістати меджі пять країн, котры найлїпше дістали під контролю пандемію нового коронавірусу. У вівторок о тім інформовав дитректор Інштітуту здравотной політікы Мартін Сматана і премєр Іґор Матовіч (OĽaNO) на Урядї влады СР.

Подля владного аналітіка ся так може Словакіям выгнути сценарям, якы ся указали в Італії, Іспанії ці в америцькім штатї Ню Йорк. Вершына епідемії бы на Словакії могла быти приближно в половинї юла. Подля Сматану але треба звышыти капаціту шпыталїв і строго дотримовати правила приближно три аж штири місяцї. Нова аналіза одгадує, же при вершынї епідемії може быти коло 170 тісяч накаженых, што є 2,3 перцента популації. При помалшім шырїню ся натягне аж до року 2021. Аналітіци але підкреслили, же іде о неґатівный сценарь, котрый ся не мусить сповнити. Правила, котры влада і централный крізовый штаб прияли по 16. і  27. марцю, бы мали помочі знижыти цїлкову кількость накаженых. Єднов з алтернатів рїшіня сітуації є подля Матовіча то, же ся Словакія на два ці три тыжднї „выпне‟. Потребный бы быв але істый „сполочный договор‟, реалізованый наприклад аналізов аґентуры. В тым припадї бы подля слов премєра забезпечовало выключно максімално 150 тісяч людей інфраштруктуры штату.  

Подля слов владного аналітіка Сматану бы таке „выпнутя‟ значіло, жебы одборници точно знали встановити, хто має сімптомы похворїня COVID-19, і такого чоловіка бы могли отестовати. „Тото рїшіня заводжують лем штаты, котры суть у барз сылнім наростї, як Італія і Іспанія. Они уж не мають іншу можность,‟ доповнив. „Окрем методолоґічных роздїлів, што ся дотуляють технічных річей, штудія, котру сьме первістно опубліковали, рахує як день нула 16. марца 2020. Нова штудія рахую день нула в недїлю (29. 3.). Кедь теперь твердиме, же маме 100 днї, а твердили сьме, же маме 100 днї і перед двома тыжднями, так в принціпі сьме о два тыжднї лїпшы,‟ увів Сматана, подля котрого бы сьме мали досягнути вершыну епідемії 110-ый день од послїднёй недїлї.

При актуалнім сценарї буде Словакія потребовала приближно 1000 плюцных вентілаторів. Подля премєра Іґора Матовіча бы мала быти влада способна забезпечіти таку кількость. Припомянув, же к пристроями є треба і вышколеный персонал. Матовіч припустив, же буде треба вышколити далшых людей, а то мінімално двараз тілько.
Председа влады коментовав і то, жебы ся могла звышыти строгость правил про серніорів. Не знає але собі представити, як карантену будуть старшы люде звладати почас лїта в розгоряченых квартелях. Припустив і можности, же охранны рушка буде треба носити можно і далшый рік, евентуално до марца 2021. „Треба повісти, же нам дїти будуть глупнути, бо рік без школы, ани на псіхіку то не є добре, як будуть рік дома,‟ коментовав председа влады.

Далшый модел розвоя пандемії нового коронавірусу планує Інштітут здравотной політікы опублітікы 3. апріля 2020.

Портал Уряду влады СР, із словацького языка перетлумачів: А. З.

Script logo