31. 1. 2016: Studium Carpato-Ruthenorum 2016 Міджінародна лїтня школа русиньского языка і културы – 7. річник

Пряшівска універзіта, 05. – 25. 06. 2016

 

Пряшівска універзіта в Пряшові є єдинов універзітов у Словацькій републіцї, котра реалізує навчаня акредітованого бакаларьского, маґістерьского і докторьского штудійного проґраму русиньскый язык і література, ґестором котрого є Інштітут русиньского языка і културы. Вдяка ёго 3-тыжденному едукачному проєкту Studium Carpato-Ruthenorum – Міджінародна лїтня школа русиньского языка і културы Пряшівска універзіта є сучасно єдинов універзітов на світї, котра зареаґовала на інтерес o таку форму навчаня русиньского языка з боку домашнїх і загранічных адептів і в сучасности рихтує семый річник того  міджінародного проєкту.

Міджінародна лїтня школа русиньского языка і културы є про:

– каждого, хто ся хоче учіти русиньскый язык і спознати історію і културу карпатьскых Русинів,

– штудентів середнїх і высокых школ,

– особы над 18 років.

Цїлём проєкту є здобыти або росшырити языковы компетенції в русиньскім літературнім языку і проглубити знаня з области карпаторусиньской історії, културы, літературы, етноґрафії.

 

ПЕДАҐОҐІЧНЫЙ ПРОЦЕС

 

Педаґоґічный процес на лїтнїй школї проходить в просторах Пряшівской універзіты, ул. 17. новембра ч. 15. Навчаня ведуть высокошкольскы професоры, фундованы славісты і шпеціалісты в области карпаторусиністікы зо Словакії, Україны,

США і Канады. Педаґоґічный процес творить інтензівный курз русиньского языка (уровнї А, Б, Ц) і історії карпатьскых Русинів, котрый i на тім річнику буде росшыреный о історію русиньской літературы і културы і о мінікурз етноґрафії карпатьскых Русинів.

В цїлім педаґоґічный процес обсягує:

– 20 годин русиньской історії в анґліцькім і русиньскім языку (враховано історії русиньской літературы і културы), т. є. 2 годины каждый день, од 09.00 дo 11.00 год.

– 30 годин русиньского языка в анґліцькім і русиньскім языку, т. є. 2 годины каждый день, од 14.00 дo 16.00 год. (теорія і конверзація),

– 10 годин етноґрафії Русинів в анґліцькім і русиньскім языку (подля приложеного проґраму),

– годины конверзації в неформалных просторах, ґрупах і сітуаціях, т. є. мімо універзітных клас (подля приложеного проґраму).

Абсолвенты здобудуть Цертіфікат о абсолвованю Studium Carpato-Ruthenorum 2016.

 

КУРЗ ІСТОРІЇ КАРПАТЬСКЫХ РУСИНІВ

Лекторы: Проф. Др. Павел Роберт Маґочій, Торонтьска універзіта, Канада, Мґр. Валерій Падяк, к. н., Научный центер карпатістікы в Ужгородї, Україна, 

Курз є заміряный на історію Карпатьской Руси і карпатьскых Русинів од найстаршых часів аж по сучасность. Буде росшыреный о лекції з історії русиньской літературы і културы.

 

КУРЗ РУСИНЬСКОГО ЯЗЫКА

 

Лекторы: Асіст. Проф. Др. Елена Будовская, Джорджтавньска штатна універзіта), Вошінґтон, D. С., США

ПгДр. Кветослава Копорова, ПгД., Пряшівска універзіта, Словакія

Мґр. Марек Ґай, екстерный сполупрацовник Інштітуту русиньского языка і културы Пряшівской універзіты, Словакія

Курз є заміряный на здобытя і росшырїня языковых компетенцій в русиньскім літературнім языку. Має теоретічну і практічну часть. Теоретічна часть є заміряна на здобытя знань з области сістемной штруктуры русиньского языка. Цїлём практічной части є навчіти ся бісїдовати по русиньскы і писати. Курз буде росшыреный о годины конверзації в неформалных просторах, ґрупах і сітуаціях, т. є. мімо універзітных клас.

 

МІНІКУРЗ РУСИНЬСКОЙ ЕТНОҐРАФІЇ

Лекторы: Асіст. Проф. Др. Елена Будовская, Джорджтавньска штатна універзіта), Вошінґтон, D. С., США

Проф. ПгДр. Микола Мушинка, др. н., екстерный сполупрацовник Інштітуту русиньского языка і културы Пряшівской універзіты, Словакія

Мінікурз є заміряный на дакотры области етноґрафії карпатьскых Русинів: народны співанкы, музику, звыкы, традіції...

 

СУПРОВОДНЫ АКЦІЇ

 

Інтеґралнов частёв лїтнёй школы є супроводный проґрам, котрый ся реалізує все в пообіднїх годинах і через вікенды. Є заміряный на:

– презентацію русиньскых традіцій, фолклору і културно-сполоченьского жывота Русинів на Словеньску (фолклорный фестівал у Свіднику і русиньскы културны інштітуції в Пряшові),

– презентацію русиньской народной архітектуры і културы, културно-історічных памяток (музеї, сканзены, деревяны храмы),

– вечур русиньской літературы споєный з передаванём каждорічной Премії Александра Духновіча за літературу,

– выступлїня театру і філмовы вечоры,

– творивы дїлнї (крашіня яєць, спів, танець),

– екскурзії по Пряшові і ёго околіцї і до реґіонів северовыходной Словакії, де жыють Русины.

 

УКВАРТЕЛЁВАНЯ І СТРАВОВАНЯ

Участници лїтнёй школы будуть уквартелёваны в штандардных двойпостілёвых ізбах з припоїнём на інтернет высокошкольского інтернату на ул. 17. новембра ч. 11 в Пряшові, недалеко высокошкольского ареалу. Стравовати ся будуть в їдални высокошкольского інтернату на ул. 17. новембра ч. 13. Штуденты будуть мати к діспозіції сполочну інтернатну кухню з леднічков і прачков. Недалеко высокошкольского ареалу ся находять обходы з потравинами, дроґеріов, рештавранты, інтернетовы кавярнї, книжковы обходы, кіоскы, апатыка, заставка автобуса.

 

ЦЇНА І АДМІНІСТРАТІВНЫЙ ПОПЛАТОК

Цїна за 3-тыжднёве перебываня на лїтнїй школї є становена на 1 200 €, респ. 1 310 USD. В цїнї є загорнутый педаґоґічный процес, уквартелёваня, стравованя (фрыштик, обід, вечеря), транспорт і выклад почас екскурзій, тікеты до музеїв, сканзенів, деревяных церьквей, театру, на фестівал. Повинностёв будучіх штудентів лїтнёй школы є в становленім термінї заплатити адміністратівный поплаток (котрый ся не вертать) в сумі 100 €, респ. 110 USD.

Транспорт на лїтню школу, т. є. дорогу до Пряшова і назад, каждый участник собі платить сам. Штуденты, котры планують абсолвовати цїлый проґрам лїтнёй школы, можуть пожадати од орґанізатора штіпендію.

 

ВАЖНЫ ТЕРМІНЫ

Приглашкы на Studium Carpato-Ruthenorum 2016 ся приїмають он-лайн найпізнїше до 1. апріля 2016 на адресї urjk@unipo.sk, респ. на поштовій адресї:

Prešovska univerzita

Ustav rusinskeho jazyka a kultury

Ul. 17. novembra 15

080 01 Prešov

Slovenska republika

Адміністратівный поплаток (100 €, респ. 110 USD) треба заплатити найпізнїше до 15. апріля 2016.

Решту становленой сумы (т. є. 1 100 €, респ. 1 200 USD) треба заплатити найпізнїше до 15. мая 2016.

 

ПОТРІБНЫ КОНТАКТЫ

Приглашку на Studium Carpato-Ruthenorum 2016 і комплетный проґрам найдете на http://www.unipo.sk/pracoviska/urjk/1/LS7; www.c-rs.org.

Контактны особы про штудентів зо Словакії: Мґр. Тімеа Верешова, ПгД., тел. +421 915 412 917, і-мейл: vtimika@freemail.hu;

Мґр. Аліца Вєтошевова, тел.: +421 (51) 756 31 89, +421 907 385 301, і-мейл: urjk@unipo.sk.

Контактнa особa про загранічных штудентів: Асоц. Проф. Др. Патріція А. Крафчік, krafcikp@evergreen.edu.

Заплатити мож банковым шеком адресованым на:

Prešovska univerzita v Prešove

p. Katarina Sabolova

Ul. 17. novembra 15

080 01 Prešov

Slovenska republika

або банковым трансфером:

Назва рахунку (учту): Bežny učet Prešovska univerzita Prešov

Чісло рахунку: 7000066503/8180

BIC - SWIFT: SUBA SKBX

IBAN: SK15 8180 0000 0070 0006 6503

Назва банкы: Štatna pokladnica

Адреса банкы: Radlinskeho 32

810 05 Bratislava 15

Варіабілный сімбол: 1780

Тїшыме ся на вас на Studium Carpato-Ruthenorum 2016 – 7. річнику Міджінародной лїтнёй школы русиньского языка і културы на Пряшівскій універзітї.