30. 9. 2018: Днї европской културной дїдовизны 2018
Цїлый септембер проходили на цїлій Словакії Днї европской културной дїдовизны 2018. До фестівалу ся запоїли і вшыткы музеї, зряджователём котрых є Пряшівскый самосправный край. Про навщівників приправили коло 50 културных подій.
В рамках Днїв европской културной дїдовизны в Крайскім музею у Пряшові было выставлено коло 60 історічнлх годинок з періоду 18. – 20. стороча од годинарьскых майстрів скоро з цїлой Европы.
В Каштелю у Стропкові прирыхтовали выставку найвекшой збіркы петролеёвых ламп в Европі з партнерьского музею в польскім Кроснї.
Музей в Кежмарку про своїх навщівників приправив презентацію нового зборника з одборной конференції Род Текелі.
Каштель і Археопарк у Ганушівцях над Топлёв привітали публіку у своїх просторах з нагоды штирёх років археопарку. Навщівникам ся предствили у выновленій подобі, а то в контексї з новов археолоґічнов експозіціёв і Транскарпатьсков археолоґічно-културнов путёв.
Любовняньскый музей привернув увагу публікы на Астрономічну ніч на Старолюбовняньскім замку.
Музей модерного уменя Енді Варгола в Меджілабірцях привітав гостїв на концертї блус-рокового співака і ґітарісты Ґвіна Аштына, а в рамках той акції прочітав свою лекцію главный куратор музею Др. Михал Бицко, ПгД.
Отворїня новой експозіції приправив Шарішскый музей в Бардеёві, котрый ся зосередив на представлїня Бардеёвскых купелїв.
Підтатраньскый музей у Попрадї мав на проґрамі творчі днї заміряны на синёдрук.
Вігорлатьскый музей в Гуменнім приправив День традічных ремесел у своїм сканзенї.
Окрем музеїв у Пряшівскім краї, ся до події запоїла і Татраньска ґалерія в Попрадї, котра меджі свої актівности запоїла і отворїня выставкы Парты в 21. сторочу. Выставка ся складать з фотоґрафій і парт як складовых частей народных країв із різных реґіонїв Словакії.
Днї европской културной дїдовизны суть подіёв, котра выникла з ініціатівы Рады Европы і Европской комісії. Проходить у місяцю септембер каждый рік у 49-ёх державах Европы. Основным цїлём фестівалу є проглубити інтерес жытелїв о културну дїдовизну і єй охрану, як і звышыти културну ідентічности народа за помочі представлїня векшынв неприступных памяток, легко приступных памяток „в іншім світлї‟. Тот рік фестівал нїс пі гесло Принимана дїдовизна.
Леа ГЕІЛОВА, Оддїлїня комунікації і меджінародных одношін ПСК
