30. 5. 2024: Меджі Старинов і бывшым селом Руське є 14 км обновленых біціґлёвых стежок

Старину і бывше село Руське в Сниньскім окресї капчать 14,3 км зреконштруованых біціґлёвых стежок. Роботы тырвали веце як рік а выжадали собі цїлкову інвестіцію 7,4 міліона евр. Інформовала о тім Даша Єленёва з Оддїлїня комунікації Пряшівского самосправного краю (ПСК).

„Днесь є то о понад 14 кілометрів довга готова траса із Старины по Руське, котра має капчаня на цїклотрасу выбудовану штатныма лїсами, яка іде аж на польскый бік на Руське сідло, што нам уможнює досправды красну біціґлёву приємность,“ повів у віторок, 28-го мая 2024-го року, почас переданя зреконштруованых стежок до хоснованя председа ПСК Мілан Маєрьскый.

Притягне турістів, створить робочі можливости

„Но то не вшытко, уж в близкім часї то буде о новых выбудованых ці добудованых ціклотрасах і в напрямі на Стащін, а меджі Влычом і Кривым. Цїлково в рамках ціклоокругу Poloniny trail бісїдуєме о 26 кілометрах, што є приблизно третина нашого проєкту, і то вже справды фантастічне чісло,“ додав пряшівскый жупан.

За словами Маєрьского біціґлісты поступно приходять обдивляти пекрасны Полонины і тутешню сценерію природы на двох колесах.

„Кедь скапчаме народный парк з окресным містом Снина, буде то єдно прекрасне біціґлёве дїло, котре до того куточка нашого краю бізовно притягне іщі векше множество і загранічных турістів. Поможе то турістічному руху і людям, котры ту жыють, бо їм то принесе новы робочі можности што до уквартелёваня і стравованя,“ думать председа ПСК. Як далше повів, Полонины бере як цїлок, де край хоче створити комплекс служеб.

Перед докінчіньом далшы части

Перед докінчінём суть і далшы части Poloniny trail. Край в напрямі на Стащін будує вісем кілометрів новых ціклотрас, біціґлёву лавочку, підход і далшы елементы в рамках інфраштруктуры про біціґлістів.

Меджі Влычом і Кривым реалізують ся роботы на добудованю біціґлёвой стежкы в довжці 3,5 км, а так само там прибудуть і далшы елементы інфраштруктуры, наприклад алтанок.

В планї є і обнова полонинськых частей біціґлёвых стежок в довжцї майже 38 км. Дотулять ся то части напрямом на Снину, части Влыч – Березовець – Кална Розтока, части стежкы на Кривый, але так само части Рунина – Руськый Потік – Кривый – Кална Розтока – Стащіньска Розтока – Стащін.

 

Петро МЕДВІДЬ, ЛЕМ.фм, языкова і ґрафічна управа: АРК в СР