30. 4. 2021: Елена ХОМОВА-ГРІНЁВА: Нагоблюю..., Колесо щастя, Падать додж (Стишкы)

Елена Хомова-Грінёва

 

Нагоблюю...

Гоблём нагоблюю

тверду капусту

на тонкы фалаткы.

Потім до бочкы

натолочу.

Кажда головка капусты –

як розузлене клубя болести.

Падають гоблинкы капусты –

незагоєны язвы на душі,

боляча кривда в жывотї,

на марны кускы

нарїзана.

 

 

Колесо щастя

Колесом щастя закрутиме,

не знати ці выйде выгра,

не вхопиш го за пачускы,

хоць бы-сь чекав

до судного дня.

Оно, як молоко

помеджі палцї втече,

налляте на цїдилї верьхом.

Шкода розллятого

по дылёх,

так розплыне ся

скоро і сон,

одлетить наше щастя

далеко під хмары

за сонцём.

 

Падать додж

Помалы клёпкать

доджік на облачок,

як мілый в капелюсї

звечера.

Пришла нечекана буря,

замкла ключами сердця.

Бруд скоро змыє

вода-доджівка.

Обмыє заболочене

сумлїня.

Запахне чістотов

дражка полёва.

Зась рано настане

в душі потїшіня.

 

(Выбране з Літературного конкурзу Марії Мальцовской, рік 2020.)