30. 4. 2020: Варголь довыліцитуваня. Дохід піде на поміч артистам потерпілым в результаті пандеміі

Фундация Енді Варголя в кооперациі з анґлицкым авкцийным домом Christie’s продают ориґінальны знимкы авторства короля поп-арту. Дохід з авкциі переданый буде на підпору фонду на поміч для артистів потерпілых в наслідстві пандеміі.

Од 28. квітня/апріля до 6. мая проходит авкция пн. «Andy Warhol: Better Days». Є то 60 знимок Варголя презентуючых просты приємности звязаны з інтеракцийом з другым чловеком. Фотоґрафіі вказуют на здібніст Варголя з достеріганю красы в пересічных, штоденніх річах.

На поміч артистам

Фундация Енді Варголя одкрыла проґрам помочы для артистів початком того місяця в одповіди на пандемію. Початковый буджет выносил 1,6 млн дулярів. Підпору выплатили уж артистам – каждый достал по 100 тис. дулярів. Авкция має підперти проґрам о додатковы 2,6 млн дулярів.

Тіж і інчы американьскы інституциі оферуют поміч артистам, якы нашли ся в тяжкій ситуациі. Серед них сут м.ін. авкцийный дом Phillips, якій спілпрацує з фондом Robin Hood, The Getty Trust ци Hauser & Wirth.

Варгольова здібніст достерігати приємности штоденного жытя

Кажду з 60 можливых до выліцитуваня знимок выбрали з огляду на тото, што, смотрячы на них, можеме уявити си тот час, коли буде ліпше. Знимкы оддают чудовіст перебываня на свіжым повітрю і простых приємности звязаных з інтеракцийом з другым чловеком. «Мусиш позволити, жебы дрібны річы, котры ти ся обмерзли, нараз зачали тя захоплювати» – повіл колиси Енді.

Майкель Дейтон Герман, директор од справ ліценций, маркетінґу і продажы в Фундациі Енді Варголя, разом з домом Christie’s выбрали одповідні знимкы. Про іх спілпрацу повіл: «Сме захоплены спілпрацом з Christie’s, што дозвалят Фундациі збільшыти поміч і інвестувати в соспільніст, коли того найбарже потрібує».

Наталія МАЛЕЦКА-НОВАК, ЛЕМ.фм

(Публікуєме в оріґібналї – лемківскім варіантї русиньского языка.)