30. 3. 2020: Премєр: „Штат поволить одкрытя далшых фірем і обходїв, але за строгых условій.‟

Братїслава 28. марца (ТАSR)Штат уможнить в понедїлок (30. 3.) одкрыти далшы фірмы і обходы. Суть меджі нима очны оптікы, станції STK a EK, заградкарьства, обходы з продаём ставебных матеріалів, ґалантерії ці адвокатьскы і нотарьскы канцеларії.

По їднаню членів централного крізового штабу то в суботу повів премєр Іґор Матовіч (OĽaNO) з тым, же так штат зробить лем за строгых гіґєнічных подмінок. Тоты заводить і в сучасности одкрытых обходах, як суть обходы з потравинами і дроґерії. В них ся мать обмеджіти і кількость людей в обходах. Повинна буде дезінфекція рук ці охранны рукавіцї. Поготовостны лїкарнї і ветерінарны амбуланції будути отворены і в недїлю.

По новому будуть отворены і фірмы лізінґовых служеб, сервісы рахунковой і телекомунікачной технікы, адвокатьскы і нотарьскы канцеларії, важны службы, зберовы дворы, метровый текстіл і ґалантерія, продаж і сервіс біціглїв, заградніцтва і обходы заградной технікы, обходы з продаём ставебного матеріалу, іншталачного і електроіншталачного матеріалу, желїзарства, фареб і лаків. „Хто не сповнить подмінкы, тот не отворить,‟ додав міністер Марек Крайчі (OĽaNO).

Як повів премєр, строгы рїшіня суть в штирёх конкретных кроках. Носїня рушок є повинне на верейности, значіть і в обходї, фірмі, выробній фабрицї. „Вшытко, што є мімо дому,‟ пояснив Матовіч. Кажда фірма і обход буде повинна од понедїлка, 30. марца, забезпечіти дезінфекцію рук або єдноразовы рукавіцї, ідеално обидва. (Позн ред.: днесь єм быв в супермаркетрї Кауфлант, а ніч з того ся там не діяло). Так само мусять забезпечіти мінімалный одступ два метры в рядї. В тых заряджінях буде мусити по новому і раховати кількость людей в інтерьєрї. Ту буде мочі в єднім часї быти максімално єден чоловік на 25 метрів квадратных площі обходу. „Значіть, як приклад, кедь мать обход 1500 м2, што є класічный супермаркет, є то 1500 дїлено на 25, значіть може там быти нараз 60 людей‟, пояснив Матовіч. (Позн. ред.: днесь, 30. 3. 2020, єм быв у супермаркетї Кауфланд, але нихто тых людей не раховав, каждый, хто пришов, міг і войти до обходу, также тото наряджіня в супетрмаркетах здасть ся нам нереалне!?) „За тых строгішых условій ся отворять і очны оптікы, лізінґовы службы, службы СТК і ЕК, сервіс компютерной технікы, адвокатьскы і нотарьскы службы,‟ додав Матовіч.

В припадї, же тоты наряджіня не будуть обходници дотримовати, влада планує вернути ся к актуалному ставу а тоты додаточно отворены обходы ці фірмы заперти. Єдночасно додав, же в обходных домах будуть надале отворены лен тоты обходы і фірмы служеб, котры были отворены і дотеперь. Додав, же єствує і максімалный розмір обходу, котрый буде мож открыти, кедьже влада хоче так підпорити малых і середнїх подникателїв...

Главный гіґєник СР авізовав, же будучій тыждень хочуть прияти рїшіня, жебы штат захопив вшыткых Словаків (Позн. ред.: треба поужывати слова – „обчане Словакії‟, бо ту жыють і представителї народностных меншын), котры ся вертають до країны зо заграніча. Не буде ся то дотуляти лем ґруповых орґанізованых транспортів автобусом ці лїтадлом, але і інвідуалных. Мікас означів Словаків, што ся вертають споза граніць за різікову ґрупу в одношіню із шырїнём нового коронавірусу. „Можуть быти здроём інфекції і зробити далшы місця наказы по цїлій Словакії,‟ підкреслив з тым, же апелує на одповідность тых людей.

Портал Уряду влады СР, зо словацького языка перетлумачів і скоротив: А. З. , фотка: TASR.

Script logo