30. 12. 2021: Вышов православный церьковный календарь на рік 2022

Обчаньске здружіня Братство св. Йова Пачаєвского в тых днях выдало православный церьковный календарь на 2022-ый рік з назвов „Православный карпаторусскій календарь‟. 80-сторінковый календарь зробленый подля слов выдавателя главно про потребы Русинів, але і вшыткых, котры ідуть подля юліаньского календаря.

Календарь обсягує юліаньске календаріум писане в азбуцї, суть в нїм інформації о святах, постах і волноцях у 2022-ім роцї. Духовны статї собі в нїм мож прочітати по русиньскы, по словацькы і в земліньскім діалектї. Векшына є писана латиніков, але і азбуков, а меджі статями можете собі прочітати і народны ці церьковны стихы будителїв, як і сучасных авторів.

„Од часів православной місії в Ладомировій, котрой монахы выдавали новинкы і календарь, православны Русины на Словакії не мали церьковно-народну пресу, де бы нашли православне календаріум у азбуцї і духовны статї заміряны і на підпору народного усвідомлїня,‟ пишуть авторы календаря.

Календарём хотять авторы надвязати на монастырь в Ладомирові і ёго плодну місію, котра была перервана одходом монахів зо Словакії на Запад.

„Небарз нас тїшыть, же векшына статей в календарї є, правда, написана по русиньскы, але латиніков, і кедь собі думаме , же азбука бы мала быти єдиным русиньскым писмом. Причіна є смутна, але правдива – многы люде нашу азбуку не знають чітати, і жебы холем дашто духовно-народне дізнали ся, пишеме главно латиніков‟, інформують авторы.

Новый православный календарь собі можете купити в інтернетовім обходї www.duchovne-knihy.sk або го просьте у своїх духовных на парохіях.

-пем-, Народны новинкы Інфо Русин, ґрафічна і языкова управа: ред. АРК в СР.