30. 10. 2020: Гелена ҐІЦОВА-МІЦОВЧІНОВА: ПИШУ ПРО ШКОЛЯРЇВ (Стихы)

Гелена ҐІЦОВА-МІЦОВЧІНОВА
ПИШУ ПРО ШКОЛЯРЇВ

Де Ендіго
поп-арт на стїнї,
де в долинї
зашепочуть
горы синї,
де цёкотить
чіста вода 
у ярочку,
а в букварю
засвітило
родне слово
у рядочку,
де родина 
при Отче наш
довєдна 
рукы зложыть,
Господи помилуй
заспівають 
в храмі Божім,
на одпустї
у родинї
сын і дївка
на гостинї,
там зашліфованый,
росцвитый
златый поклад 
про Русинів.

***
Уж русиньскым дїтём в школї
розьяснены твари,
бо з радостёв отворяють
новенькый букварик.

Кажде слово, што у школї
з радостёв выгварять,
якбы пташа вылетїло
співом із букваря.

Якы слова у молитві? 
Просять ся школяря.
Сміло повість – выписаны
з нашого букваря.

Погласкала свою Розку
Кочішова Маря,
як про мамку прочітала
стишок із букваря.

Потїшыли бы заїсто 
і самого краля
златы слова,што Русинам
світять із букваря.

***
Ці надомнов сам Архангел
розпинать все крыла,
же я музу нерозлучну
в своїм сердцї скрыла.

Може матери прошіня
рано, вечур слухать,
зато пише все на папірь
дар Святого Духа.

На біленькім паперику
рядочок синїє,
бо в нїм слова із азбукы
поклад про Русинів.

***

На долинцї зберам
од яри квіточкы,
з якых в гаю звию
Русинам віночкы.

З букварём до світа
хочу вырушыти,
материньскым словом
дїтей потїшыти.

Захраньте, дїточкы,
русиньску бісїіду
жебы із валалу
не счезла без слїду.

***

Уж настали про Русинів
тоты красны рочкы,
бо в азбуцї приповідкы
чітають дїточкы.

Най з головы школярикы
чудже не вышмарять,
але своє материньске
чітають з букваря.

Будуть красны співаночкы
у школї співати
а русиньске любозвучне
слово розвивати.

(З приправлёваной книжкы Гелены Ґіцовой Міцовчіновой – Поклад русиньской матери.)