30. 1. 2022: Юбілей професора ГEНРИКА ФОНТАНЬСКОГО

Генрик Фонтаньскый (Henryk Fontański) нар. 30. 1. 1947 у Ченстоховій, у Польщі. Є польскым лінґвістом і професором універзіты.

Г. Фонтаньскый учів російскый язык у Высшій педаґоґічній школї в Ополе (1971 – 1978) і на Слезскій універзітї в місті Катовіце (1978 – ; професор у р. 2000). Ту довгы рокы робив як директор Інштітуту выходославяньской філолоґії Філолоґічного оддїлїня.

Од зачатку 1990-ых років актівно сполупрацує з Русинами-Лемками у сферї кодіфікації їх языка, опубліковав дакілько бадань на тоту тему. В шырокій научній творчости Г. Фонтаньского находить ся много публікації занимаючіх ся проблемами лемківского языка. То є, наприклад, „Ґраматыка лемківского языка‟ (2000), якой є сполуавтором вєдно з Мирославов Хомяк, ци „Студия над лемківскым синтаксисом‟ (2014). Выступав на многых научных семінарах або конфереціях, наприклад, і на ІV. Меджінароднім конґресї русиньского языка, котрий проходив у септембрї 2015 роцї в Пряшові,

Юбілантови желаме многых і благых лїт!

-аз-