30. 1. 2020: Проґрам Театру Александра Духновіча в Пряшові на місяць фебруар 2020

1-го фебруара 2020

На ревізію (Велика сцена, 19.00 год.)

Остра сатірічна комедія о жывотї і роботї сільского старосты і о тім, як рїшыв проблемы сільскых людей. В пєсї найдете достаток гумору і музикы, як і выпитой водкы і глубокого значіня. Пєса є приступна молодежи од 16 років.

 

5-го фебруара 2020

Тяпаковцї (Велика сцена, 19.00 год.)

Дія славной драматізації прозаічной предлогы вызначной словацькой писателькы з епохы крітічного реалізму Божены Сланчіковой-Тімравы вас перенесе до минулости, на село, до дому великой родины Тяпаковцїв, котра є прославлена тым, же є лїнива і не має дяку будьшто робити. Інсценація жыво, з легкостёв, забавно але з ідейнов глубков підкреслює потребу ослободити ся од наносів минулости на благо будучности, котра ся основать на старых пілірах, но не сміє їх зохабити цалком спустнути. Жывот ся мусить жыти!

 

8-го фебруара 2020

Фараоны (Велика сцена, 19.00 год.)

Фунґованя колхозу, в котрім панують класічны стереотіпы о дїлїню роботы на хлопску і женьску, нарушыть єдного рана вість о вычеряню позіцій. Там, де стояли хлопи, будуть жены і навспак. Што ся стане, кедь хлопи-функціонарї, нараз будуть женами, котры ся старають о обыстя? Комедія Фараоны приносить гуморну і выдарену моделову сітуацію на тему перевернутя сполоченьскых роль.

 

12-го фебруара 2020

Домашнє гнїздо (Велика сцена, 19.00 год.)

Комедія о нас і дїлах, котры нас роблять тым, кым сьме: нашых родічах, нашых любвах, нашых несповненых снах і о тых, котры наповнили ся, хоць сьме ани не надіяли ся на тото, о надії – бо будьяк кліше і спрофанована є, все вмерать послїдня, ці ся нам то любить, ці нїт. Комедія нелем о Русинах і Выходї, а о каждім (і про каждого), хто колись мусив вернути ся домів, хто колись з дому хотів втечі, хто даколи у своїм жывотї холем на даякый час став частёв даякого домова і взяв на себе дакотру роль: родіча, дїтины, сородника, мужа…

 

15-го фебруара 2020

Ла музика (Мала сцена, 19.00 год.)

Оріґінално по словацькы написана драма, котра на судьбі єдной родины захоплює дії соро цїлого 20-го столїтя. Інтересность той драмы є в тім, же музика, котра є вобще спринимана як култівачный фактор сполочности, в тім припадї стає ся причінов траґедії цїлой фамелії.

 

19-го фебруара 2020

Чуєш, мамо… (Велика сцена, 19.00 год.)

Твір сербского автора Воїслава Савіча, в котрім автор на взорцї єдной родины вказує на взник напятя і траґічных недорозумлїнь в одношіню меджі найблизшыма. Жебы автор обышов травматізуючі зажыткы із боку публікы, намагать ся формов комедіялности рїшыти тоты проблемы.

 

22-го фебруара 2020

Москва – Петушкы (Мала сцена, 19.00 год.)

Твор Москва – Петушкы Венедікта Єрофеєва є часто означованый як роман-поема, і бере ся за ключовый твір російской постмодерны. Історія є барз проста: Венечка ся зобудить скоро рано по перепитой ночі на ґарадічах московского панелаку, напитый у весмірных параметрах. Но вырїшыть, же навщівить свою любов в Петушках, містечку далекім дакілько годин влаком. Почекать, покля одкрыють першы склепы, накупить деякы предметы, котры треба ку пережытю (або скоріше ку непережытю) той драгы… І іде ку желїзнічній штації. Наступить до влаку і… Дійде до цїля своёй драгы? Не дійде? То вже не повіме…

 

26-го фебруара 2020

„Пошились у дурні“ (Велика сцена, 19.00 год., пєса в україньскім языку)

Україньскый комедіоґраф Марко Лукич Кропивницькый представлює ся в Театрї Александра Духновіча далшов комедіёв. 12 дівок на оддаваня, но жаден жених, холем не на першый погляд. Богатый млинарь Кукса і ёго сусїд коваль Дранко суть безнадїйны в гляданю богатого мужа про своє велике потомство, но не знають, же жены ся о себе знають постарати самы і поміч од отцїв їм нияк не треба.

Петро МЕДВІДЬ, ЛЕМ.фм